ეკონომიკისა და მდგრადი განვითარების მინისტრი ქობულეთის ტურისტულ ზონას სათანადოდ წარმატებულად არ მიიჩნევს. როგორც სააგენტო "ჯი-ეიჩ-ენთან" საუბრისას, ეკონომიკისა და მდგრადი განვითარების მინისტრმა განაცხადა, ქობულეთის ტურისტული ზონა ანაკლიის ტურისტული ზონის მსგავსად წარმატებული არ არის.
"ქობულეთის ტურისტული ზონა არ არის ისეთი წარმატებული, როგორც ანაკლიის ტურისტული ზონა. ინვესტორების მხრიდან უფრო მეტი დაინტერესება ანაკლიის ტურისტული ზონის მიმართ იქნება გამოხატული. თუმცა ქობულეთშიც მიმდინარეობს მშენებლობები და სამუშაოების დასრულების შემდეგ ქობულეთის ტურისტულ ზონაში ძირითადად ქობულეთის მაცხოვრებლები დასაქმდებიან. ჩვენ არ ვაპირებთ ამ პროექტის გაჩერებას. აჭარის მთავრობა და საინვესტიციო სააგენტო მუშაობს იმაზე, რომ გაცილებით მეტი ინვესტორის შემოყვანა მოხდეს"- განუცხადა "ჯი-ეიჩ-ენს" ვერა ქობალიამ.
შეგახსენებთ, რომ თავის დროზე სამთავრობო კომოსიამ 8 ინვესტორი გამოავლინა, რომლებთაც 15 სასტუმრო კომპლექსი უნდა აეშენებინათ, თუმც შემდგომ ინვესტორთა ნაწილი თამაშიდან გავიდა და ამ დროისათვის ქობულეთის ნტურისტულ ზონაში 3 სასტუმროს, ორი კომპანია აშენებს. როგორც ცნობილია, ქობულეთში "თავისუფალი ტურისტული ზონის" განვითარების მიზნით, ე. წ. "ფიჭვნარის" ტერიტორიზე, ზღვიდან 140 მ-ის დაშორებით, ახალი სასტუმროების მშენებლობისთვის მთავრობამ პოტენციურ ინვესტორებს განსხვავებული შეღავათები შესთავაზა.პროექტის თანახმად, ე. წ. "ფიჭვნარის" ტერიტორიზე, გამოყოფილია მიწის 3 ნაკვეთი (საერთო ფართით 11,3 ჰა), რომლებზედაც დაგეგმილია 30 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის მსურველს შეუძლია არჩევანი გააკეთოს. ასევე, განსაზღვრულია, სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).
პროექტის თანახმად, სამშენებლო მიწის ნაკვეთის განკარგვა განხორციელდება სიმბოლურ ფასად, დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ. ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.