ხვალ, 23 დეკემბერს, 13:00 საათზე, "ახალგაზრდა ფინანსისტთა და ბიზნესმენთა ასოციაცია - აფბა" ქართულ-ამერიკულ უნივერსიტეტში ეკონომიკისა და ბიზნესის სპეციალობის სტუდენტებთან და ლექტორებთან შეხვედრას გამართავს. "აფბა" უმაღლესი სასწავლებლის წარმომადგენლებთან ჩატარებული კვლევის - "ფიჭური კავშირგამბულობის ბაზარი საქართველოში" - ფარგლებში სატარიფო პოლიტიკის თანამედროვე ტენდენციებს განიხილავს.
შეხვედრაზე შეფასებული იქნება საქართველოს კომუნიკაციების ეროვნული კომისიის გადაწყვეტილების შედეგად დღეს არსებული მდგომარეობა, რომლის ძალითაც, საქართველოში მობილურ ოპერატორებს შორის ურთიერთჩართვის ტარიფი შემცირდა. ამასთან, "აფბა" სასწავლებლის სამართლის, ეკონომიკისა და ბიზნესის მიმართულების სპეციალობის სტუდენტებს ერთობლივი კვლევების მომზადების კუთხით, თანამშრომლობასაც შესთავზებს.
"ახალგაზრდა ფინანსისტთა და ბიზნესმენთა ასოციაციამ" კვლევა "ფიჭური კავშირგამბულობის ბაზარი საქართველოში" 2010 წლის თებერვალში გამოაქვეყნა. ამ კვლევის თანახმად, საქართველო მობილური კავშირის მომსახურების სიძვირის მიხედვით, პოსტსაბჭოთა სივრცეში, პირველ ადგილს იკავებდა, ხოლო, მსოფლიოს 186 ქვეყანას შორის, მესამე ადგილზე იყო. ასეთი რეიტინგით, საქართველო დიდ ბრიტანეთს, ამერიკას, საფრანგეთს, იაპონიას და კანადას აღემატებოდა.