კვლავ გრძელდება სს ,,ბანკი ქართუს" კლიენტურის ბანკში გირაოდ ჩადებული და აღსრულების ეროვნული ბიუროს მიერ დაყადაღებული უძრავ-მოძრავი ქონების საჯარო აუქციონზე გატანის პროცესი. ამის შესახებ ინფორმაციას "ბანკი ქართუ" ავრცელებს. განცხადების თანახმად, მიმდინარე კვირის განმავლობაში აუქციონებზე გატანილია დამატებით კიდევ 11 ობიექტი (ჯამში 67,8 მილიონი ლარის ღირებულებით), რომლის საწყისი ფასი ამ ღირებულების 50 პროცენტს შეადგენდა.
აღნიშნული ბანკის ინფორმაციით, დღეს, 2011 წლის 22 დეკემბერს მიმდინარეობს კიდევ 2 ობიექტის რეალიზაცია საჯარო აუქციონზე ჯამური საწყისი ღირებულებით 4,5 მლნ. ლარი.
"შედეგად, ბოლო 2 კვირის მანძილზე აღნიშნულ საჯარო აუქციონებზე გატანილია ჩვენს ბანკში გირაოდ ჩადებული 40 ობიექტი, ჯამში 115 მილიონი ლარის ღირებულებით, რომლის საწყისი ფასი ამ ღირებულების 50 პროცენტს შეადგენდა", - აღნიშნულია განცხადებაში.
"ბანკი ქართუ" ყურადღებას ამახვილებს რამდენიმე ფაქტზე და აცხადებს, რომ საჯარო აუქციონებზე გატანილი არცერთი ქონება პრაქტიკულად არ გაყიდუკა, მათი დიდი ნაწილი ეკონომიკის სამინისტრომ დაისაკუთრა. ასევე ბანკის ინფორმაციით, საჯარო აუქციონებზე გამოტანილი 3 ობიექტის შემთხვევაში დაფიქსირდა ვაჭრობის ფაქტი (მათ შორის, 2 შემთხვევაში "ქართუ ბანკი" მონაწილეობდა), სადაც ქონების შეძენით დაინტერესებულ პირებს კონკურენტი გამოუჩნდათ ეკონომიკის სამინისტროს სახით და აღნიშნული აუქციონები ეკონომიკის სამინისტროს გამარჯვებით დასრულდა.
"საჯარო აუქციონზე გამოტანილ ერთ ობიექტზე ვაჭრობისას, კანონით და პროცედურულად განსაზღვრულ ვადაზე ადრე აუქციონი შეწყდა და ბანკს უფლება აღარ მიეცა, შემდგომი ბიჯების მიცემის პროცესი გაეგრძელებინა. აშკარაა, რომ ხელისუფლება ამ პროცესსაც აკონტროლებს და დაინტერესებულია, რომ ქონებები რაც შეიძლება დაბალ ფასად ჩაიგდოს ხელში. საჯარო აუქციონზე გამოტანილი ერთი ობიექტის შემთხვევაში: ობიექტის პირველადი იპოთეკარი იყო სხვა კომერციული ბანკი, ხოლო მეორე რიგის იპოთეკარი - სს „ბანკი ქართუ". მესაკუთრისთვის აღმოჩენილი საგადასახადო ვალდებულების წარმოშობის თარიღი მოექცა 2 ბანკის იპოთეკის წარმოშობის თარიღებს შორის; შედეგად _ ჩვენი ბანკის იპოთეკა გაუქმდა, ხოლო კოლეგა კომერციული ბანკის იპოთეკა შენარჩუნდა. აღნიშნული ფაქტი კიდევ ერთი დემონსტრირებაა იმისა, რომ კანონმდებლობაში შეტანილი ცვლილებები მხოლოდ სს „ბანკი ქართუს" მისამართით განხორციელებული სადამსჯელო ოპერაციაა", - აღნიშნულია ბანკის განცხადებაში, რომლის თანახმადაც, "გაუგებარია საგადასახადო ორგანოების მოქმედების ლოგიკა - როდესაც გადასახადის გადამხდელს საგადასახადო ვალდებულება აღმოაჩნდება, თანხების ამოღების უპირველეს ინსტრუმენტი ყოველთვის ბანკებში გახსნილ ანგარიშებზე საგადასახადო ინკასოს წარდგენაა, ორგანიზაციის საბანკო ანგარიშებზე არსებული და ჩასარიცხი თანხების ოპერატიულად ამოღების მიზნით".
"არც ერთი ორგანიზაციას, რომელთა ქონებებიც დააყადაღეს, მომსახურე კომერციულ ბანკებში ინკასო არ წარუდგენიათ. მეტიც, ერთ-ერთი ბიზნეს-ჯგუფის შემთხვევაში, ინკასო წარმოადგინეს აუქციონების ჩატარებისა და ქონების უმეტესი ნაწილის ეკონომიკის სამინისტროს მიერ დასაკუთრების შემდეგ, ჩვენი ინფორმაციით, წარმოშობილი საგადასახადო დავალიანების სრულ თანხაზე. ცხადი ხდება, რომ ხელისუფლება დაინტერესებულია არა ბანკის კლიენტი ორგანიზაციებიდან საგადასახადო დავალიანებების ამოღებით, არამედ ამ ორგანიზაციების მიერ სს „ბანკი ქართუს" სასარგებლოდ იპოთეკით/გირავნობით დატვირთული ქონებების ჩამორთმევით", - იუწყება "ქართი ბანკი".
"ბანკი ქართუ" მოუწოდებს საქართველოს ხელისუფლებას, შეაჩეროს სს ,,ბანკ ქართუზე" უსამართლო ზეწოლა.
