საქართველოს პრეზიდენტი მიხეილ სააკაშვილი ქობულეთში ვერულიძეებს საოჯახო სასტუმროს ესტუმრა. როგორც სააკაშვილმა განაცხადა, ქობულეთში მთავარი საზღვაო კურორტია საქართველოს არაოკუპირებული ნაწილის და მის განსავითარებლად აუცილებელი სამუშაო უნდა დაიწყოს.
"ქობულეთში დამსვენებლების კლება ბათუმის განვითარებამ და ქობულეთში არსებულმა მაღალმა ფასებმა გამოიწვია. ფასები არ შეესაბამება იმას, რაც არის მოთხოვნა. ბათუმი, როგორც ბავშვს დააყენებენ ფეხზე, ისე დავაყენეთ და 100-ჯერ უფრო მეტად განვითარდება თავისით. ახლა უნდა გადმოვერთოთ ქობულეთზე და აჭარის მაღალმთიანეთზე. ქობულეთში მთლიანად უნდა გამოიცვალოს განათება, მოწესრიგდეს ბულვარი, რადგან საბჭოთა დროიდან ბევრი არაფერი შეცვლილა. ასევე უნდა მოწესრიგდეს გარეშე ფასადები, ამას მნიშვნელობა აქვს ტურისტის მისაზიდად", - განაცხადა პრეზიდენტმა.
მისი თქმით, უნდა მოხდეს მუშაობა იმაზე, რომ ფასები ჩამოვიდეს ქვემოთ.
"ქობულეთს უნდა მივხედოთ, რადგან ჩამოგვრჩა. მთავარი კაპიტალური ინვესტიციები გაკეთებულია, მაგრამ ახლა უნდა გაკეთდეს ის, რაც ტურისტს იზიდავს. აუცილებელია კარგი სარეკლამო კამპანია. ქობულეთი მთავარი საზღვაო კურორტია საქართველოში არაოკუპირებული ნაწილის და ამიტომ აქ უნდა ყველაფერი შემოვატრიალოთ უკეთესობისკენ", - აღნიშნა პრეზიდენტმა.
