ევროკავშირმა საქართველოს სახელმწიფო ბიუჯეტში 26,2 მილიონი ევრო გადარიცხა. ამის შესახებ სააგენტო "ჯი-ეიჩ-ენს" საქართველოში ევროკავშირის წარმომადგენლობიდან აცნობეს.
გამოყოფილი თანხიდან, 21.1 მილიონი ევრო ე.წ. "სპეციალური ღონისძიებებისთვის" დაიხარჯება, რომელსაც საქართველოს მთავრობა იძულებით გადაადგილებული პირთა მხარდასაჭერად გაატარებს. ეს მხარდაჭერა ხელს შეუწყობს საქართველოს იძულებით გადაადგილებული პირებისთვის სამოქმედო გეგმაში დასახული ამოცანების მიღწევაში, კერძოდ: იძულებით გადაადგილებული ოჯახების განსახლება და ახალი ბინების მშენებლობა ფოთში, ბათუმსა და წყალტუბოში.
ხოლო 5.1 მილიონი ევრო 2009 წელს შეპირებული 19 მილიონი ევროს ნაწილია, პროფესიული განათლების სექტორის მხარდასაჭერად. ევროკავშირი განსაკუთრებულ მნიშვნელობას ანიჭებს განათლებასა და გადამზადებას, რადგან ის საქართველოსა და ევროკავშირს შორის თანამშრომლობის და დიალოგის ერთ-ერთ ძირითადი სფეროა.