საქართველოს მთავრობასა და ჩინეთის სახალხო რესპუბლიკის მთავრობას შორის ხელი მოეწერა "ეკონომიკური და ტექნიკური თანამშრომლობის შესახებ" შეთანხმებას, 60 მილიონი ჩინური იუანის გამოყოფაზე.
დოკუმენტს ხელი მოაწერეს საქართველოს მთავრობის სახელით, საქართველოს ფინანსთა მინისტრმა დიმიტრი გვინდაძემ და ჩინეთის სახალხო რესპუბლიკის მთავრობის სახელით, ჩინეთის სახალხო რესპუბლიკის საგანგებო და სრულუფლებიანმა ელჩმა საქართველოში ჩენ ჯიანფუ.
შეთანხმების ფარგლებში ჩინეთის სახალხო რესპუბლიკის მთავრობის მიერ გრანტის სახით გამოიყოფა 60 მილიონი ჩინური იუანი (დაახლოებით 9.5 მლნ აშშ დოლარი). „აღნიშნული გრანტით დაფინანსდება საქართველოსთვის პრიორიტეტული ეკონომიკური და ტექნიკური თანამშრომლობის პროექტები, რომელთა შერჩევა განხორციელდება მხარეებს შორის კონსულტაციების საფუძველზე. ერთ-ერთი პრიორიტეტული მიმართულება იქნება სოფლის მეურნეობა. ესაა დახმარება, რომელიც ნაწილია იმ დადებითი სავაჭრო საინვესტიციო დინამიკისა, რომელიც ბოლო წლებია არსებობს ჩვენს ქვეყნებს შორის," - განაცხადა ფინანსთა მინისტრმა დიმიტრი გვინდაძემ.
რაც შეეხება ზოგადად, სოფლის მეურნეობის განვითარებას, ფინანსთა მინისტრის თქმით, მიმდინარეობს მუშაობა სამი ძირითადი მიმართულებით: ესაა მხარდაჭერა, რომელიც სოფლის მეურნეობის განვითარებისთვის გამოიყოფა სახელმწიფო ბიუჯეტიდან, მეორე - დიდი დამხარება, რომელსაც დარგი იღებს დონორი ორგანიზაციებიდან. „დაახლოებით 250-270 მლნ დოლარის ოდენობითაა ის პროექტები, რომლებიც უკვე მიმდინარეობს და რომლის დაწყებას ვაპირებთ 2012 წლის განმავლობაში. მესამე ვექტორია ბიზნესის მაქსიმალური ჩართულობა, რათა ლიდერის როლი სოფლის მეურნეობის განვითარების კუთხით, სწორედ კერძო სექტორმა დაიკაოს," - განაცხადა ფინანსთა მინისტრმა.
სავაჭრო და საინვესტიციო კუთხით, ჩინეთი საქართველოს ერთ-ერთი მნიშვნელოვანი პარტნიორია. ჩინეთის სახალხო რესპუბლიკის მთავრობის მიერ საქართველოსთვის 2005 წლიდან დღემდე, გრანტების სახით უკვე გამოყოფილია 100 მლნ იუანი (დაახლოებით 15.8 მლნ აშშ დოლარი) და 30 მლნ იუანის (დაახლოებით 4.7 მლნ აშშ დოლარი) ოდენობის 20-წლიანი უპროცენტო სასაქონლო კრედიტი. ამ ფინანსური მხარდაჭერით განხორციელდა და ამჟამად მიმდინარეობს შემოსავლების სამსახურის აღჭურვა საქონლის, კონტეინერებისა და სატრანსპორტო საშუალებების რენტგენო-სკანირების თანამედროვე სისტემებით (მათ შორის სარკინიგზო-საინსპექციო სისტემები და მობილური სკანერები), რაც მნიშვნელოვნად ხელს უწყობს ეკონომიკური საზღვრის გადაკვეთის დროს გაფორმების პროცედურების გამარტივებასა და დაჩქარებას, სხვა ქვეყნებთან საერთაშორისო სავაჭრო ნაკადების წახალისებას. საგარეო ვაჭრობის განვითარება ქვეყნის ეკონომიკური ზრდის ხელშეწყობის და ქვეყანაში დამატებითი სამუშაო ადგილების შექმნის ერთ-ერთი მნიშვნელოვანი ელემენტია.