"ლოიალობის (დაგროვების) ბარათებით" განხორციელებული ოპერაციები საგადასახადო რეგულირებას აღარ დაექვემდებარება. როგორც დღეს ბიზნესასოციაციისა და შემოსავლების სამსახურის უფროსის შეხვედრისას გახდა ცნობილი, ე.წ. დაგროვებითი ბარათით შეძენილ ქონებაზე სუბიქეტს საშემოსავლო გადასახადის გადახდა აღარ მოუწევს.
"სხვადასხვა კომპანია საკმაოდ ხშირად იყენებს დაგროვების ბარათებს. მაგალითად, თქვენ გაქვთ "პოპულისა" და " გუდვილის" ბარათები. რაც მეტს ყიდულობ, გიგროვდება ქულები. სუბიექტებს ამ ქულების სანაცვლოდ გარკვეული ფასდაკლებით ესა თუ ის პროდუქცია ეძლევათ. ეს კი აღარ ჩაეთვლებათ მათ რეალიზაციაში და ამ საშუალებებს ეფექტურად გამოიყენებენ", - განუცხადა სააგენტო "ჯი-ეიჩ-ენს" შემოსავლების სამსახურის უფროსმა ჯაბა ებანოიძემ.
ბიზნესასოციაციის საგადასახადო-საბაჟო კომიტეტის ხელძღვანელი ზურაბ ლალაზაშვილი "ჯი-ეიჩ-ენთან" საუბრისას ამბობს, რომ აღნიშნული საკითხის ინიცირება ბიზნესასოციაციას ეკუთვნის.
"ლოიალობის ბარათთან" დაკავშირებით ჩვენი ასოციაციის წევრების მიერ დაყენებული იქნა საკითხი. როდესაც სუბიექტს აქვს ე.წ დაგროვების ბარათი და ის ყიდულობს პროდუქციას, მას ბარათზე უგროვდება ქულები და ამ ქულების სანაცვლოდ იღებს საჩუქარს, ეს მიღებული საჩუქარი არ წარმოადგენდეს მისთვის დამატებით შემოსავალს და არ უნდა ექვემდებარებოდეს საშემოსავლო გადასახადით დაბეგვრას", - აღნიშნა "ჯი-ეიჩ-ენთან" საუბრისას ლალაზაშვილმა, ბიზნესმენებისა და შემოსავლების სამსახურის უფროსის შეხვედრის დაწყებამდე.
როგორც ცნობილია, 2011 წლის 1-ლი იანვრიდან "საგადასახადო კოდექსით" ამოქმედდა ნორმა, რომლის მიხედვითაც, თუ სუბიექტმა უსასყიდლოდ მიიღო რაღაც აქტივი, ის დაბეგრვას ექვემდარება.
ბიზნესასოციაციის წევრებისა და შემოსავლების სამსახურის უფროსის შეხვედრა 25 ოქტომბერს სასტუმრო" შერატონ მეტეხი პალასში" გაიმართა და მისი მიზანი ბიზნესმენებისთვის საგადასახადო სფეროში დაგეგმილი სიახლეების გაცნობა და საქართვეოს ბიზნესასოციაციის მიერ საგადასახადო კანონდებლობასთან დაკავშირებით ინიცირებული წინადადებების განხილვა იყო.
საქართველოს ბიზნესასოციციისა და შემოსავლების სამსახურს შორის თანამშრომლობის ფარგლებში მსგავსი შეხვედრები სისტემატურად იმართება. შეხვედრების მიზანი ბიზნესსა და საგადასახადო ორგანოებს შორის დიალოგი და ინფორმაციის გაცვლაა, რაც საბოლოო ჯამში საგადასახადო გარემოს გაუმჯობესებას და დახვეწას ემსახურება.
"მოხარული ვართ, რომ შემოსავლების სამსახურის ხელმძღვანელი ბიზნესმენებს ხვდება და ბოლო პერიოდში ეს ურთიერთობა ბევრად აქტიური გახდა. ის სიახლეები, რაც ბოლო პერიოდში გვესმის, მნიშვნელოვანია ბიზნესისთვის და რაც მთავარია, ესაა ჩვენი ერთობლივი ნამუშევარი. ბიზნესმენი და სახელმწიფოს წარმომადგენელი ერთად სხდებიან და პრობლემების გადაწყვეტას ერთობლივად წყვეტენ", - აღნიშნა ბიზნესასოციაციის პრეზიდენტმა გიორგი ჭირაქაძემ.
როგორც შეხვედრაზე გახდა ცნობილი, შემოსავლების სამსახურის ინიციატივით იგეგმება ცვლილებები მთელ რიგ საკითხებთან დაკავშირებით, კერძოდ, მარტივდება საწყობის საქმიანობისთვის ნებართვის გაცემის პროცედურები და შესაბამისი რეგულაცია, იგეგმება სპეციალური სავაჭრო კომპანიის ცნების შემოღება. ცვლილებები იგეგმება საქართველოს ეკონომიკურ საზღვარზე გადაადგილებისას ტვირთების გაფორმებისთვის.
"შეხვედრაზე ყურადღება გამახვილდა იმ ცვლილებაზე, რომელიც კანონში შევიდა და რომელიც სასაწყობე მეურნეობის ხელშეწყობას და უცხოური პროდუქციის რეექსპორტს უკავშირდება. გვინდა, საქართველოს იქცეს უცხოური პროდუქციის დასაწყობებისა და შემდგომ სხვა ქვეყნებში რეექსპორტის ქვეყნად, რომელიც მნიშვნელოვნად გაზრდის კომპანიების შემოსავლებს, რომელთაც საწყობები აქვთ", - განმარტა შემოსავლების სამსახურის უფროსმა ჯაბა ებანოიძემ.
შეხვედრაზე საუბარი ასევე შეეხო იმ ცვლილებებს, რომლებიც ბიზნესისთვის განსაკუთრებითY მნიშვნელოვანია ამ ეტაპზე და ინიცირებული იქნა საქართველოს ბიზნესასოციაციის საგადასახადო-საბაჟო კომიტეტის მიერ, კერძოდ: ე.წ. "ლოიალობის (დაგროვების) ბარათებით" განხორციელებული ოპერაციების საგადასახადო რეგულირება; საგარანტიო მომსახურების საგადასახადო რეგულირება; საკუთარი წარმოების შენობა-ნაგებობის ძირითად საშუალებად გამოყენების დაბეგვრის რეგულირება; ურთიერთდამოკიდებულ პირებს შორის გარიგების განხორციელებისას საბაზო ფასის გამოყენების რეგულირება.
