გერმანიისა და საქართველოს მთავრობებს შორის მორიგი ხელშეკრულება გაფორმდ, რომელიც საქართველოსთვის 4 მლნ. ევროს გამოყოფას ითვალისწინებს. დღეს, 25 ოქტომბერს საქართველოს ფინანსთა მინისტრმა დიმიტრი გვინდაძემ და საქართველოში გერმანიის ფედერაციული რესპუბლიკის ელჩმა ორთვინ ჰენიგმა ხელი მოაწერეს შეთანხმებას „საქართველოს მთავრობას და გერმანიის ფედერაციული რესპუბლიკის მთავრობას შორის ფინანსური თანამშრომლობის შესახებ".
შეთანხმების მიხედვით, იძულებით გადაადგილებული პირების საცხოვრებელი პირობების გაუმჯობესებისათვის, გერმანიის მთავრობა საქართველოს მთავრობას გრანტის სახით გამოუყოფს დამატებით 4 მლნ ევროს. გერმანიის მთავრობის ფინანსური მხარდაჭერით იგეგმება ახალი თანამედროვე საცხოვრებელი სახლების მშენებლობა დასავლეთ საქართველოში. „ესაა, მეორე ფაზა აღნიშნული პროექტისა, რომელიც წარმატებულად ხორციელდება წყალტუბოში, ქუთაისსა და ფოთში. აღსანიშნავია, რომ გერმანიის მთავრობის მიერ უკვე გამოყოფილია 6 მლნ ევრო, რომლის მიზანია, გაუმჯობესდეს დევნილთა საცხოვრებელი პირობები აღნიშნულ ქალაქებში. შედეგად, შესაძლებელი გახდება იძულებით გადაადგილებული ოჯახების უზრუნველყოფა თანამედროვე, კომფორტული საცხოვრებელი პირობებით," - განაცხადა ფინანსთა მინისტრმა დიმიტრი გვინდაძემ.
როგორც ცნობილია, 19-20 ოქტომბერს, თბილისში გაიმართა საქართველო-გერმანიის სამთავრობო მოლაპარაკებები ფინანსური და ტექნიკური თანამშრომლობის შესახებ. აღნიშნული სამთავრობო მოლაპარაკებები იმართება ორ წელიწადში ერთხელ და წარმოადგენს ორმხრივი თანამშრომლომის მნიშვნელოვან ინსტრუმენტს. მხარეები შეთანხმდნენ თანამშრომლობაზე ეკონომიკური განვითარების, ენერგეტიკის, გარემოს დაცვის, სოფლის მეურნეობის, რეგიონული და ურბანული განვითარების ხელშყობის სფეროებში. გერმანიის მთავრობისგან მიღებულია დაპირება, დამატებით დაახლოებით 75 მლნ ევრომდე ფინანსური რესურსის გამოყოფასთან დაკავშირებით. მათ შორის:
9 მლნ ევრო გამოყოფილია მცირე და საშუალო ზომის საწარმოების მხარდასაჭერად (Agricultural Finance Programme), რომლებიც აწარმოებენ, ამუშავებენ და ყიდიან სასოფლო სამეურნეო პროდუქციას. პროგრამა ითვალისწინებს სოფლის მეურნეობის დარგში მცირე ბიზნესის დაკრედიტების ხელშეწყობას საქართველოში მოქმედი კომერციული ბანკების და მიკროსაფინანსო ორგანიზაციების გავლით.
20 მლნ ევრო გამოიყოფა განახლებადი ენერგიების სფეროში ინვესტიციების განხორციელების მიზნით (Renewable Energy Programme). პროგრამა მიზნად ისახავს მცირე ჰიდროელექტროსადგურების რეაბილიტაციას და მისი დაფინანსება განხორციელდება საქართველოში მოქმედი კომერციული ბანკების შუამავლობით.
4.25 მლნ ევრო გრანტის სახით (Promotion of Protected Areas) მოხმარდება საქართველოში დაცული ტერიტორიების გაუმჯობესებას და მათი გეოგრაფიული არეალის გაფართოებას. რეგიონული მასშტაბით 13.5 მლნ ევრო გრანტის სახით გამოიყო გარემოს დაცვის კუთხით ინსტიტუციონალური გაძლიერების ხელშეწყობის მიზნით.
ბათუმის ცენტრში სანიაღვრე სისტემის გაუმჯობესებისთვის გამოიყო 7 მლნ ევრო.
გერმანული მხარე სწავლობს შესაძლებლობას, ქართულ მხარეს აღმოუჩინოს მხარდაჭერა ეკოლოგიურად მდგრადი თანამედროვე ნაგავსაყრელის მოწყობის პროექტის განხორციელებაში.
მიმდინარე საკანონმდებლო და სამართლებრივი რეფორმების მხარდასაჭერად გრანტის სახით, ტექნიკური თანამშრომლობის კუთხით, დამატებით გამოიყო 5 მლნ ევრო (Support to Legal and Judicial Reforms).