მთავრობამ ხე-ტყის ბიზნესის რეგულაცია გაამკაცრა. თუმცა ხე-ტყის მოპოვების პროცედურები, სოციალური მიზნით, გაამარტივა. როგორც დღეს პარლამენტში, საკომიტეტო მოსმენისას, ენერგეტიკისა და ბუნებრივი რესურსების მინისტრმა აღნიშნა, მოსახლეობას ტყეში შესვლა და ხე-ტყის მოპოვება გართულებული ჰქონდა, თუმცა დღეს მოსახლეობას ეს პრობლემა აღარ აქვს.
"შეზღუდვა მოხსნილია და მოსახლეობას დღეს აქვს იმის საშუალკება, რომ ტყიდან გამოიტანოს იმდენი შეშა, რამდენიც სჭირდება და რის საფასურსაც გადაიხდის", - განმარტა ხეთაგურმა და დასძინა, რომ სოციალური მიზნით ხე-ტყის მოძრას გარკვეული შეზღუდვებიც ახლავს.
"შეზღუდვა არის ის, რომ ე.წ. "სოციალური ჭრების" დროს მოსახლეობას არ აქვს ამ შეშის გაყიდვის უფლება. საკუთარი საჭიროებისთვის მოსახლეს ექნება საშუალება, რომ საჭირო ხე-ტყე ტყიდან გამოიტანოს, თუნდაც ახალი სახლის ასაშენებლად", - აცხადებს მინისტრი.
რაც შეეხება ხე-ტყის სამრეწველო ჭრებს, ანუ როდესაც ინდმეწარმეს ან კომპანიას სურს აწარმოოს ბიზნესი, მთავრობამ მას პირობები გაუმკაცრა.
"შემოვიღეთ ფირნიშები, ანუ ე.წ. აქციზური მარკები" და შემოვიღეთ სპეციალური ანგარიშფაქტურები. დღეისთვის ბაზარზე ხე-ტყის მასალა არ შეიძლება გაიყიდოს სპეციალური ანგარიშფაქტურების გარეშე. შესაბამისად, ბაზრის კონტროლით მივაღწევთ იმას, რომ უკანონო ჭრა აღარ იქნება. თუკი ბაზარზე უსაბუთო მასალის რეალიზაცია აღარ იქნება დასაშვები, ხეს უსაბუთოდ და უნებართვოდ აღარავინ მოჭრის, ეს საკმაოდ ლოგიკურია", - განაცხადა ხეთაგურმა.
მინისტრი განმარტავს, რომ ბაზრის კონტროლი აუცილებელი იყო, რადგანაც ბაზარზე სარეალიზაციოდ გამოტანილი ხე-ტყის 70 %-ი უკანონოდ იყიდებოდა.
"ახლა საჭიროა ბაზრის სერიოზული კონტროლი. 15 სექტემბერს იყო პირველი ანგარიშფაქტურების ჩაბარების ვადა და, ბუნებრივია, იყო დარღვევებიც, რადგანაც ბიზნესი ახლა ეჩვევა სპეციალური ანგარიშფაქტუირების გამოწერას. მანამდესრული ვაკქანალია იყო და ხე-ტყის 70 %-ი უკანონოდ იყიდებოდა", - აღნიშნა ხეთაგურმა.
