2012 წლის ბიუჯეტის განხილვა გაერთიანებული კომიტეტების სხდომაზე მოხდება. როგორც დღეს ბიუროს სხდომაზე საფინანსო-საბიუჯეტო კომიტეტის თავმჯდომარემ ზურაბ მელიქიშვილმა განაცხადა, უმჯობესი იქნება თუ 2012 წლის ბიუჯეტის განხილვა გაერთიანებული კომიტეტებნის სხდომაზე მოხდება, თუმცა მანამდე ცალკეული კომიტეტი, ბიუჯეტის საკითხებზე, მთავრობასთან ინტენსიურად იმუშავებს.
"იმ რეფორმებიდან გამომდინარე, რომელიც განვახორციელეთ, ჩვენ უკვე გადავედით პროგრამულ ბიუჯეტზე. რაც ქვეყნისათვის მნიშვნელოვანია. მისი განხილვისთვის ყველა ვადა იქნება დაცული. აღსანიშნავია, რომ მომავალი წლის ბიუჯეტი 323 მლნ. ლარით იზრდება და 2012 წლის ბიუჯეტი 7 მლრდ. 633 მლნ. ლარით იქნება განსაზღვრული. ძირითადი პირიორიტეტები ისევ ჯანდაცვა და ინფრასტრუქტურა იქნება. სერიოზული პროექტები განხორციელდება, ასევე აგროსექტორშიც"- აღნიშნა ზურაბ მელიქიშვილმა.
პარლამენტის ვიცე-სპიკერის, გიგი წერეთელის განმარტებით კი, რომელიც ბიუროს დღევანდელ სხდომას უძღვებოდა, ქვეყანას პირველად აქვს, სრულად პროგრამული ბიუჯეტი. მისი თქმით, პროგრამულ ბიუჯეტზე გადასვლა ეტაპობრივად ხდებოდა და 2012 წლის ბიუჯეტი კი სრულად პროგმაული კლასიფიკაციითაა შედგენილი.