2012 წლის ბიუჯეტის პარამეტრების შესაჯერებლად მთავრობა და პარლამენტი კონსულტაციებს იწყებს. როგორც სააგენტო „ჯი-ეიჩ-ენთან" საუბრისას მთავრობის საპარლამენტო მდივანმა გია ხუროშვილმა განაცხადა, 2012 წლის ბიუჯეტის დამტკიცება სავარაუდოდ, ნოემბრის ბოლოს მოხდება. ხუროშვილის თქმით, 2012 წლის ბიუჯეტი, 2011 წლის ბიუჯეტთან შედარებით 323 მლნ. ლარით იქნება გაზრდილი.
„მიუხედავად იმ პროცესებისა, რომელსაც თვალს ვადევნებთ, მთელს მსოფლიოში მძვინვარებს კრიზისი და ვხედავთ მის ნეგატიურ გავლენებს სხვადასხვა ქვეყნებზე. საქართველოს მთავრობის პროგნოზი საკმაოდ ოპტიმისტურია. მთავრობა გეგმავს, რომ 2012 წლის ბიუჯეტი 323 მლნ. ლარით გაზარდოს. 2012 წლის ბიუჯეტი მთლიანობაში 7 მლრდ. 623 მლნ. ლარით იქნება განსაზღვრული. იგეგმება რომ მშპ-ს ზრდა განხორციელდეს 5,5 %-ით. თუკი 2010 წელს საბიუჯეტო დეფიციტი იყო 6,6 %, უკვე 2012 წლის ბიუჯეტის პროექტში საბიუჯეტო დეფიციტი შემცირებულია 3,6 %-მდე და მომავალ წლებში დეფიციტის შემცირება კვლავ გაგრძელდება"- აღნიშნა გია ხუროშვილმა.
მთავრობის საპარლამენტო მდივანი აცხადებს, რომ მთავრობა 2012 წლიდან ბიუჯეტის პროგრამულ კლასიფიკაციაზე გადადის და 2012 წლის ბიუჯეტის შედგენაც პროგრამულად მოხდა.
„მთავრობა პარლამენტში 2012 წლის ბიუჯეტის პროექტით უკვე შემოვიდა, რომელიც არის ახალი წესით შედგენილი და არის პროგრამული ბიუჯეტი - რაც მარტივად რომ ვთქვათ ნიშნავს იმას, რომ თითოეული ციფრის უკან იქნება ახსნა განმარტებები, იმ პროექტების თაობაზე, რომელსაც მთავრობა აპირებს რომ განახორციელოს, რაც ჩვენი მოსახლეობის კეთილდღეობაზე იქნება ასახული. პრიორიტეტები კვლავ არის უცვლელი. მთავრობა თვალს უსწორებს რეალობას და ჩვენ კვლავ გავაგრძელებთ იმ პროექტების განხორციელებას რომელიც დაწყებულია და ხორციელდება საქართველოს დედაქალაქში და ასევე ცალკეულ რეგიონებში. მთავრობა განახორციელებს ისეთ პროექტებს, რომელიც ხელს შეუწყობს ახალი სამუშაო ადგილების შექმნას და არსებული სამუშაო ადგილების შენარჩუნებას"- აღნიშნა ხუროშვილმა.
მისი თქმით, 2012 წელს პრიორიტეტად რჩება ასევე მოსახლეობის სოციალური მდგომარეობის გაუმჯობესებაზე ორიენტირებული პროექტები.
„პრიორიტეტია ის რომ კიდევ უფრო მეტ ადამიანს მიეცეს ჯანდაცვაზე ხელმისაწვდომობა და ისარგებლოს ჯანდაცვის სერვისებით"- აცხადებს ხუროშვიული