სოფლის მეურნეობის სამინისტროს რთველის საკოორდინაციო შტაბს ჯერ ისევ არ აქვს ინფორმაცია, რომელი კომპანიები ჩაიბარებენ ჰიბრიდული ჯიშის ყურძენს. შტაბის უფროსის ტარიელ გაბუნიას თქმით, ჰიბრიდული ჯიშის ყურძენს რამდენიმე კომპანია ჩაიბარებს და მისი მაქსიმალური ფასი 18 თეთრი იქნება. ამ ჯიშის ყურძენზე სახელმწიფო სუბსიდიას არ გასცემს.
წინასწარი მონაცემებით, წელს კახეთში 5 090 ტონა ჰიბრიდული ჯიშის ყურძნის მოსავალია მოსალოდნელი. ჰიბრიდული ჯიშის ყურძნის ყველაზე მეტ მოსავალს - 1934,5 ტონას ახმეტის რაიონში ელოდებიან; საგარეჯოში 987 ტონას; გურჯაანში 790 ტონას; ყვარელში 788 ტონას; თელავში - 232 ტონას; სიღნაღში 168 ტონას; დედოფლისწყაროში 100 ტონას და ლაგოდეხის რაიონში 91 ტონას.
გასულ წელს კახეთში ჰიბრიდული ჯიშის ყურძენი სახელმწიფო საწარმომ „რთველი - 2008" 10-15 თეთრად ჩაიბარა. სულ რეგიონში 4 335 ტონა ჰიბრიდული ჯიშის ყურძნის მოსავალი მოვიდა. 18 - 20 თეთრად ჩაიბარეს 1 კგ ჰიბრიდული ჯიშის ყურძენი ახალსოფლის და ყვარლის ღვინის ქარხნებმა. ჰიბრიდული ჯიშის ყურძენზე სუბსიდია არ გაიცემა. გლეხების თქმით, ჰიბრიდული ჯიშის ყურძნის ფასი იმდენად იაფი იყო, რომ ღვინის ქარხნამდე ტრანსპორტირების ხარჯებიც კი ვერ აანაზღაურა.
