აჭარის ფინანსთა და ეკონომიკის სამინისტროსა და საქართველოს ადგილობრივი თვითმმართველი ერთეულების ფინანსისტთა ასოციაციის ერთობლივი ორგანიზებით, ბათუმში, სასტუმრო "ინტურისტ პალასში" საქართველოს თვითმმართველი ერთეულების ფინანსისტთა და საფინანსო სექტორის ექსპერტთა შეხვედრა გაიმართა.
აჭარის ფინანსთა და ეკონომიკის სამინისტროს ინფორმაციით, შეხვედრაზე 2010 წლის ანგარიში განიხილეს. შეხვედრაზე მოხდა ასევე სახელმწიფო ხარჯების და ფინანსური ანგარიშგების ეფექტიანობის შეფასების სისტემისა და ასევე სახელმწიფო ბიუჯეტის პროგრამული ბიუჯეტის ფორმით შედგენის მეთოდოლოგიის განხილვა.
შეხვედრაზე აირჩიეს ასოციაციის გამგეობის ახალი წევრები. მათ შორის ერთ-ერთ წევრად - აჭარის ავტონომიური რესპუბლიკის ფინანსთა და ეკონომიკის მინისტრი ვაჟა ბოლქვაძე. შეხვედრის ბოლოს საუკეთესო ბიუჯეტის ფორმატისთვის უკვე მეორედ დაჯილდოვდა აჭარის ფინანსთა და ეკონომიკის სამინისტრო. თვითმმართველობებს შორის კი საუკეთესო ბიუჯეტის ფორმირებისთვის დაჯილდოვდა ქედის მუნიციპალიტეტი.
