ტურიზმის ეროვნული სააგენტოს მხარდაჭერით, 10 სექტემბერს, 10:00 საათზე, დაბა სტეფანწმინდაში წელს უკვე მეორედ ტარდება "ყაზბეგის მარათონი".
მარათონი გაიმართება ზღვის დონიდან 1700 მეტრზე, ველურ ბუნებაში, დიდი კავკასიონის გრანდიოზული ხედებისა და მყინვარწვერის ფონზე. იგი შესულია მსოფლიოს წამყვან სათავგადასავალო მარათონების სიაში.
წარმოდგენილი იქნება რთული და ამავდროულად საინტერესო მარშუტები 4 დისტანციაზე: 8 კმ., 21 კმ., 42 კმ. და 53 კმ.
შარშან ჩატარებული მარათონისგან განსხვავებით, წელს დაემატა 53 კმ.-იანი ულტრამარათონი, რომელიც მორბენლებს უფრო მეტ შესაძლებლობას აძლევს საკუთარი ძალების დემონსტრირებაში. მათ სირბილი უწევთ ზღვის დონიდან 2800 მეტრზე.
გაიზარდა უცხოელ მორბენალთა რიცხვი, შარშან მონაწილეობდა 30 უცხოელი, წელს კი მათი რიცხვი 60-ს აღწევს. სულ მონაწილეობას მიიღებს 200-მდე მორბენალი.
წლევანდელი მარათონი გამორჩეულია მონაწილეთა შემადგენლობით: 10 ქვეყნიდან ჩამოსულ და ქართველ მორბენლებთან ერთად ირბენს მსოფლიოში ერთ-ერთი ცნობილი გერმანელი მარათონელი, რომელსაც თითქმის მსოფლიოს ყველა მარათონში აქვს მონაწილეობა მიღებული, ასევე დიდი ბრიტანეთისა და შვეიცარიის ელჩები და დიპლომატიური კორპუსის წარმომადგენლები.