ანაკლიაში ბულვარის მშენებლობისათვის მთავრობა დამატებით 3 მლნ. ლარს დახარჯავს. აღნიშნული თანხა ცენტრალური ბიუჯეტიდან შპს „ანაკლია-განმუხური რესორტსს" გადაერიცხება, რომლიც შემდგომ მის განკარგვას მოახდენს და თანხას ბულვარის მშენებლობისათვის დახარჯავს.
ანაკლიამ, 22 აგვისტოს საკურორტო ქალაქის სტატუსი უკვე შეიძენა. ქალაქში ჩასულ დამსვენებლებს განახლებული ინფრასტრუქტურა და ესპანელი არქიტექტორის მიერ დაპროექტებული კილომეტრნახევრიანი ბულვარი დახვდებათ.
ანაკლიაში სასტუმროების, ფეხბურთის სტადიონების, კალათბურთის მოედნებისა და სხვა სპორტული თუ დასვენების ობიექტების მშენებლობა უკვე დაწყებულია. შენდება ორი ახალი სასტუმრო და ევროპაში ყველაზე დიდი, 540 მეტრიანი საფეხმავლო ხიდი, რომელიც ანაკლიას განმუხურთან დააკავშირებს.
ანაკლიაში დაიწყო ასევე გრანდიოზული აკვაპარკის მშენებლობა, დასრულდა ევროპულ დიზაინზე მოწყობილი ამფითეატრი.
ანაკლიის განახლების იდეა პრეზიდენტს ეკუთვნის და როგორც ცნობილია ინვესტორს, რომელიც 18 თვეში ანაკლიაში სასტუმროს ააშენებს, მოგებისა და ქონების გადასახადისგან გაათავისუფლებენ. ამასთან, მეწარმეს უკვე მოწესრიგებული გზა და გოგირდის წყლები დახვდება. ის ინვესტორი, რომელიც 100-ნომრიან სასტუმროს ააშენებს და კაზინოს გახსნის, მოსაკრებელისგან თავისუფალი იქნება.