პოლიტიკური მოძრაობა „იმედის" ლიდერის ირინა სარიშვილის განცხადებით, იმის ალბათობა, რომ თბილისში მიმდინარე აქიცები რუსეთისგან იმართებოდა, თითქმის არარსებობს.
როგორც სარიშვილმა პარლამენტის შენობის წინ გამართულ ბრიფინგზე განაცხადა, რეალურად, რუსეთი საქართველოში საპროტესტო აქციებს ორგანიზებას არ გაუწევს, რადგან ის საქართველოს დღევანდელი ხელისუფლების მხარდამჭერია.
"რუსეთი საქართველოს ხელისუფლებას უჭერს მხარს. მას აწყობს, რომ დღევანდელი ხელისუფლების სათავეში სააკაშილის მთავრობა იყოს, რადგან რუსეთისთვის ის სასარგებლო ქმედებებს ახორციელებს", - განმარტა მან.
ამასთან, სარიშვილის თქმით, 26 მაისის მოვლენებზე პასუხისმგებლობა არავითარ შემთხვევაში აქციის ორგანიზატორებს არ უნდა დაეკისროს.
"პასუხიმსგებლობა მთლიანად ხელისუფლებაზე უნდა გადანაწილდეს და მათ შორის მიხეილ სააკაშვილზე, რომელმაც პირდაპირი ბრძანება გასცა, ასეთი ძალადობრივი გზით დაეშალათ აქცია. ამასთან, გარკვეული პასუხისმგელობა უნდა დაეკისროს ოპოზიციას, ოღონდ არა მხოლოდ ბურჯანაძეს - მთლიანად ოპოზიციურ სპექტრს, რადგან მისმა შეუთანხმებლობამ გამოიწვია ის, რომ ტარდება გაუაზრებელი და დაუგეგმავი საპროტესტო აქციები, რომელსაც ხელისუფლება სათავისოდ იყენებს", - აღნიშნა სარიშვილმა.
გარდა ამისა, „იმედის" ლიდერმა აქციის აქციებსა და მის დაშლასთან დაკავშირებით უცხოელი დიპლომატების, მათ შორის ჯონ ბასის მიერ გაკეთებული განცხადება, ასევე ოპოზიციური პარტიების „უმოქმედობა" და გუშინდელ აქციაზე მყოფი „ყველა ადამიანი დაგმო, გარდა ჯარისა".
"მინდა განვაცხადო, რომ ჩვენ ვგმობთ ჯონ ბასისა და სხვა დიპლომატების განცხადებებს. მიგვაჩნია, რომ ამით ისინი ქვეყნის შიდასაქმეებში უხეშად ერევიან. ასევე ვგმობთ ყველა პარტიის ქმედებას, რომლებიც ხელს უშლიდნენ საპროტესტო აქციებს, ხოლო მათი განცხადებები პირდაპირ უნისონში მოდის ჯონ ბასის განცხადებებთან. ასევე ვგმობთ საქართველოს დამოუკიდებლობის დღისადმი გამართულ აღლუმზე დამსწრე ყველა ადამიანს, მათ შორის მომღერლებსა და მოცეკვავეებს, გარდა ჯარისა. მათ უნდა ესმოდეთ, რომ იქ, სადაც წინა ღამით დარბევა მოხდა, საზეიმო ღონისძიება არ უნდა ტარდებოდეს", - განმარტა „იმედის" ლიდერმა.
