დედოფლისწყაროს რაიონის სოფელ ქვემო ქედში საქონელი ციმბირის წყლულით იხოცება. ინფორმაციას ქვემო ქედის ტერიტორიული ორგანოს რწმუნებული ნუგზარ პაპიაშვილი და ვეტერინარი ტრისტან ზაქაიძეც ადასტურებენ.
ქვემო ქედის მკვიდრი ალექსანდრე ბექაური "ქიზიყთან" საუბარში ამბობს, მათი მეწველი ძროხა ციმბირის წყლულის, ე.წ. ჯილეხის დაავადებით მოკვდა.
,,ბექაურების ოჯახი ჩემთან მოვიდა და მთხოვა მომაკვდავი პირუტყვი დამეთვალიერებინა. როდესაც მივედი აღმოვაჩინე, რომ ციმბირის წყლულის პირველი ნიშნები აღენიშნებოდა. სისხლის დენა ცხვირიდან და უკანა ტანიდან. ასევე პირუტყვი გაბერილი იყო. ვურჩიე, რომ მისი დაკვლა და საკვებად გამოყენება აკრძალული იყო. მივუთითე, რომ ღრმად დაემარხათ, მაგრამ როგორც ვიცი სოფელთან ახლოს, 2 მეტრის სიღრმეზე დამარხეს, რაც დაუშვებელია და დაავადების კერა გახდება," - განუცხადა "ქიზიყს" სოფლის ვეტერინარმა ტრისტან ზაქაიძემ.
,,ამავე ოჯახის ეზოსთან, 100 მეტრის მოშორებით ტრაქტორმა ორმო ამოთხარა და იქ დავმარხეთ," - აცხადებს სოფლის რწმუნებული ნუგზარ პაპიაშვილი.
დედოფლისწყაროს ვეტერინარიის სამსახური მთელი დღის მანძილზე დაკეტილი გახლდათ, რის გამოც "ქიზიყმა" უსაფრთხოების ნორმების დარღვევასთან დაკავშირებით მათი მოსაზრებები ვერ მოისმინა. ვეტერინარი ტრისტან ზაქაიძე კი მომხდარით აღშფოთებულია და აცხადებს, რომ დაავადება მომავალში ისევ იფეთქებს.
