"სახალხო კრების" ერთ-ერთი ლიდერი ნინო ბურჯანაძე საპროტესტო აქციის დარბევის დროს ორი ადამიანის დაღუპვასთან კავშირს უარყოფს. განცხადება ამის შესახებ ბურჯანაძემ ტელეკომპანია "მაესტროს" ეთერში გააკეთა.
მისი თქმით, ავტომობილი, რომელთან შეჯახების შედეგად პოლიციის ლეიტენანტი გარდაიცვალა, მის ოჯახს არ ეკუთვნოდა და მის თანმხლებ კოლონაში არ შედიოდა.
რაც შეეხება აქციის მონაწილის გარდაცვალებას, ბურჯანაძის თქმით, არის მონაცემები იმის შესახებ, რომ იგი გარდაიცვალა გულის შეტევით, სპეცდანიშნულების რაზმის მიერ გაზის გაშვების შემდეგ.
შეგახსენებთ, რომ საქართველოს შს სამინისტროს მიერ გაცრცელებული ინფორმაციით, სამინისტრომ ბურჯანაძის თანაშემწე ივანე ჩიღვინაძე და მისი პარტიის წევრი ზაქარია ზურაშვილი დააკავა.
"2011 წლის 26 მაისს, 00:10 საათზე, ბურჯანაძემ, თანმხლებ პირებთან ერთად, ავტომობილების საშუალებით, მიატოვა რუსთაველის გამზირზე პარლამენტის წინ განთავსებული სცენის მიმდებარე ტერიტორია. ბურჯანაძის ესკორტი გადაჭარბებული სიჩქარით მოძრაობდა თავისუფლების მოედნის მიმართულებით, რა დროსაც ესკორტის ორი მანქანა, რომელთაგან ერთ-ერთს მართავდა ბურჯანაძის თანაშემწე ივანე ჩიღვინაძე, ხოლო მეორეს ბურჯანაძის პარტიის წევრი ზაქარია ზურაშვილი, შეეჯახა რამდენიმე ადამიანს. შეჯახების შედეგად, ადგილზე გარდაიცვალა შინაგან საქმეთა სამინისტროს თანამშრომელი, ლეიტენანტი ვლადიმერ მასურაშვილი და მოქალაქე ნოდარ ცხადაძე", _ ნათქვამია განცხადებაში.
