‘'დაიცავი საქართველოს" ლიდერ დავით მაღრაძის განცხადებით, ამერიკის შეერთებული შტატების ელჩის ჯონ ბასის მიერ გაკეთებული განცხადება „სახალხო კრების" აქციებთან დაკავშირებით, ამერიკელი იგორ როდიონოვის განცხადებაა.
‘'დარბევა არის ხელისუფლების მუშაობის ჩვეული სტილი საზოგადოებასთან. მათ საზოგადოებასთან საუბარი არ იციან. არანაირი სხვა კონტაქტი მათ არ შეუძლიათ, გარდა იმ უბედურებისა რაც დაატეხეს დღეს ქართულ საზოგადოებას. „კავკასიის" ეთერით გუშინ მივმართე ამერიკის საელჩოს რომ გაეკეთებინათ არჩევანი დემოკრატიისთვის მებრძოლ ხალხსა და ავტოკრატულ, დიქტატორულ რეჟიმს შორის. დღევანდელი ჯონ ბასის განცხადებით საელჩომ მხარი დაუჭირა ავტოკრატულ რეჟიმს. ეს არის ამერიკელი როდიონოვის განცხადება. ამ განცხადებამ კიდევ ერთხელ ამ აღვირახსნილობას მისცა სრული ასპარეზი", - განაცხადა მაღრაძემ „მაესტროს" ეთერში.
შეგახენებთ, რომ აშშ-ის ელჩმა საქართველოში ჯონ ბასმა 25 მაისს განაცხადა, რომ მას აშფოთებს ის ნიშნები, რომ თბილისში მიმდინარე საპროტესტო აქციის მონაწილეებს შორის არიან ადამიანები, რომლებიც ძალადობრივ კონფრონტაციას იწვევენ.
ბასის განცხადებით, დემოკრატიული საზოგადოების ვალდებულებაა, დაიცვას სიტყვისა და გამოხატვის თავისუფლება, მაგრამ, ამავდროულად, საპროტესტო მოქმედებებით არ უნდა შეილახოს სხვა მოქალაქეების უფლებები. აქციებმა ხელი არ უნდა შეუშალოს მოქალაქეებს გადაადგილებაში და მნიშვნელოვანი დღეების აღნიშვნაში.
"ყველა დემოკრატიული საზოგადოებისთვის მნიშვნელოვანია პატივი სცეს და დაიცვას მოქალაქეთა მშვიდობიანად შეკრების და თავისი აზრის გამოხატვის უფლება, მათ შორის პროტესტის გამოხატვისა. ასევე მნიშვნელოვანია, რომ ამგვარი ქმედებები იმ ჩარჩოებში განხორციელდეს, რომლებიც საშუალებას მისცემს ქვეყნის სხვა მოქალაქეებს თავიანთი საქმე აკეთონ. და ასევე გულისხმობს იმასაც, რომ ხელისუფლებასა და საზოგადოებას ჰქონდეს შესაძლებლობა იზეიმონ ეროვნული დღესასწაულები. შეშფოთებული ვარ იმ ნიშნების გამო, რომ მომიტინგეთა შორის არსებობენ ელემენტები, რომლებიც, როგორც ჩანს, იმაში უფრო არიან დაინტერესებული, რომ ძალადობრივი კონფრონტაცია გამოიწვიონ, ვიდრე მშვიდობიანი პროტესტი გამოხატონ და მიმაჩნია, რომ ამგვარი მიდგომა მათ გზავნილს აქარწყლებს და მათ სანდოობას ამცირებს. მე მიმაჩნია, რომ საბოლო ჯამში, ეს არ მოდის შესაბამისობაში იმ ტიპის ცვლილებებთან, რისი ნახვაც, როგორც ისინი აცხადებენ, მათ საზოგადოებაში სურთ", - განაცხადა აშშ-ის ელჩმა.
