მოძრაობის "სოლიდარობა უკანონო პატიმრებს" ლიდერი ეკა ბესელია სპეცდანიშნულების რაზმის თანამშრომლების მიერ პარლამენტის შენობის წინ მიმდინარე აქციის დარბევას "დაუნდობელ" და "სასტიკ ანგარიშსწორებად" აფასებს.
"ეს არის დაუნდობელი და სასტიკი ანგარიშსწორება საკუთარ მოსახლეობასთან. ეს არის დანაშაული, რადგან ადგილი ჰქონდა მოსახლეობის წინააღმდეგ არაპროპორციული ძალის გამოყენებას. მომიტინგეებს ხელკეტებითაც სცემდნენ, გარდა იმისა, რომ წყლის ჭავლი და რეზინის ტყვიები იყო გამოყენებული. ვფიქრობ, ეს ერთმნიშვნელოვნად შეფასდება, როგორც მშვიდობიანი მომიტინგეების დარბევა", - განაცხადა ბესელიამ ტელეკომპანია "მაესტროსთან" საუბარში.
ამასთან, მან დიპლომატიურ კორპუსსა და საერთაშორისო ორგანიზაციებს მოუწოდა, "როგორმე შეაჩეროს ხელისუფლების მიერ ხალხის წინააღმდეგ გამოჩენილი აღვირახსნილობა და ძალადობა".
