საქართველო ევროპაში ერთ-ერთი ყველაზე უსაფრთხო ქვეყანაა.ასეთია ევროპელი ექსპერტების მიერ ჩატარებული კვლევის შედეგები, რომელიც ევროკავშირმა დააფინანსა. კვლევის თანახმად, საქართველოს მოსახლეობის 98 % ქვეყანაში თავს უსაფრთხოდ გრძნობს.
კვლევა 1992 წლიდან დღემდე საქართველოში დანაშაულის შემცირების სტატისტიკას შეეხება. როგორც დოკუმენტშია აღნიშნული. დანაშაულის შემცირების თვალსაზრისით ქვეყანაში გარდატეხა ბოლო 5 წლის განმავლობაში მოხდა.
„საქართველოში ისეთი დანაშაული, როგორიცაა მანქანის გატაცება და ყაჩაღობა ასეულებიდან ერთეულებზეა დაყვანილი", - აღნიშნულია ანგარიშში.
გარდა ამისა, კვლევის მიხედვით, მოსახლეობის 87 % კმაყოფილია სამართალდამცავი ორგანოების მუშაობით და მას ნდობას უცხადებს.
პოლიციის მიმართ გაზრდილი ნდობის მაჩვენებლით საქართველო აღმოსავლეთ ევროპაში პირველ ადგილზე მოხვდა, გამოკითხულ ქვეყნებს შორის კი მესამე ადგილზეა.
ანგარიშში ე.წ. ქურდული ავტორიტეტების თემაც მოხვდა და როგორც დოკუმენტშია ნათქვამი, მოსახლეობის 70 %-ზე მეტის აზრით, ქვეყანაში ცნება „კრიმინალური ავტორიტეტი" საერთოდ აღარ არსებობს.
კვლევის ფარგლებში საქართველოს სხვადასხვა რეგიონში 3 ათასი რესპონდენტი გამოიკითხა. კვლევის პრეზენტაცია იუსტიციის სამინისტროს ინიციატივით დღეს გაიმართა.
