რუსეთის პრეზიდენტმა დიმიტრი მედვედევმა თავის მიერ მიღებულ ერთ-ერთ ურთულეს გადაწყვეტილებად, როგორც მოქალაქისა და როგორც პრეზიდენტისა, 2008 წლის აგვისტოში რუსული სამხედრო კონტიგენტის ე.წ. სამხრეთ ოსეთში გაგზავნის გადაწყვეტილების მიღება დაასახელა.
"მაინც ვცდილობ ყოველთვის ისე გავაკეთო ყველაფერი, რომ არ იყოს გულისდაწყვეტა პრეზიდენტ მედვედევზე, მოქალაქე მედვედევზე და ბლოგერ მედვედევზე, იმიტომ, რომ წინააღმდეგ შემთხვევაში უკვე სხვა მიმართულებით უნდა წავიდე", _ განაცხადა მედვედევმა კითხვაზე პასუხის გაცემისას არის თუ არა შემთხვევები, როდესაც პრეზიდენტი მედვედევი მოქალაქე და ბლოგერ მედვედევთან შედის წინააღმდეგომბაში.
ამასთან ერთად, რუსეთის პრეზიდენტმა განაცხადა, რომ "ნებისმიერი ხელმძღვანელის ცხოვრებაში, განსაკუთრებით კი სახელმწიფოს ხელმძღვანელის ცხოვრებაში დგება ძალიან მძიმე მომენტები".
"2008 წლის აგვისტო მახსენდება, როდესაც მომიხდა ძალიან რთული გადაწყვეტილების მიღება, რომელიც სამხრეთ ოსეთში ჩვენი ჯარების გაგზავნას ეხებოდა, იმისათვის რათა ჩვენი ინტერესები დაგვეცვა. შემიძლია გულწრფელად გითხრათ, რომ იოლი ნამდვილად არ იყო, იმიტომ, რომ როდესაც ამ გადაწყვეტილებას ვიღებდი, როგორც მოქმედი პრეზიდენტი, შეუძლებელი იყო, არ გამეაზრებინა, რომ ადამიანთა ნაწილი უკან ვერ დაბრუნდებოდა", _ განაცხადა მედვედევმა.
"ის, ვისაც ასეთი გადაწყვეტილებები არ მიუღია, ვერ გამიგებს. ძალიან მინდა, ასეთი გადაწყვეტილებების რაოდენობა ჩვენი სახელმწიფოსა და ჩვენი ქვეყნის ისტორიაში მინიმალური იყოს", _ განაცხადა მედვედევმა.
შეგახსენებთ, რომ 2008 წლის 8 აგვისტოს რუსეთის ფედერაციის საოკუპაციო ჯარები საქართველოს ტერიტორიაზე აფხაზეთისა და ცხინვალის რეგიონის მხრიდან შემოიჭრნენ. 26 აგვისტოს კი რუსეთმა თავის მიერ ოკუპირებული საქართველოს ეს ორი რეგიონი "დამოუკიდებელ სახელმწიფოებად" აღიარა.
