"ქართული პარტიის" პოლიტიკური მდივნის, ეროსი კიწმარიშვილის შეფასებით, "რვიანის" ფორმატი გარდაიცვალა.
"ყველანაირი მცდელობა იმისა, რომ ამ პროცესს რამენაირად სახე შეუნარჩუნონ, სამწუხაროდ, განწირულია. ამის მიზეზი სააკაშვილის რეჟიმის არაადეკვატურობაა. ამით მმართველმა რეჟიმმა დაგვანახა, რომ მასთან მოლაპარაკების გზით საარჩევნო გარემოს გაუმჯობესების ყველა მცდელობა განწირულია", - განაცხადა კიწმარიშვილმა დღეს გამართულ პრესკონფერენციაზე.
მისი თქმით, "რვიანმა", თავისი მუშაობით, გააშიშვლა ეს რეჟიმი როგორც ქართული საზოგადოების, ისე საერთაშორისო თანამეგობრობის თვალში.
"შესაბამისად, ვინაიდან ყველა კითხვაზე პასუხი უკვე გაცემულია, ჩვენი მოქმედება მიმართულია იმისკენ, რომ სამოქალაქო აქტიურობისა და პროტესტის გზით, ვაიძულოთ რეჟიმი, წავიდეს ხელისუფლებიდან, "რვიანში" გაერთიანებული პოლიტიკური ძალებიც დღეს უკვე თავიანთ სამომავლო პოზიციას აყალიბებენ. იმედი მაქვს, ბევრი მათგანი ჩაერთვება იმ პროცესში, რაზედაც დღეს "ქართული პარტია" საუბრობს", - აღნიშნა პარტიის პოლიტიკურმა მდივანმა.
