"საპარლამენტო უმრავლესობა ჩერქეზების გენოციდის აღიარებასთან დაკავშირებით მოქმედებას არსებული მასალისა და განწყობების მიხედვით აპირებს", - ამის შესახებ დიასპორისა და კავკასიის საკითხთა კომიტეტის თავმჯდომარის მოადგილემ, უმრავლესობის წევრმა რატი სამყურაშვილმა კომიტეტის სხდომაზე განაცხადა, სადაც ჩერქეზთა გენოციდის აღიარების საკითხზე მეცნიერული დასკვნის პრეზენტაცია მოხდა.
მისი შეფასებით, პარლამენტისათვის გენოციდის თემა განსაკუთრებით მგრძნობიარეა, რადგან ქვეყანამ საკუთარ თავზე იწვნია ის ძალადობა, რომელსაც შეიძლება ეწოდოს ეთნოწმენდა და გენოციდი.
"კარგად გვესმის, რომ ეს არის განსაკუთრებულად მგრძნობიარე თემა, თუნდაც პოლიტიკური თვალსაზრისით. ამიტომ არ ვაპირებთ რაიმე უხეშ მოქმედებებს. გადაწყვეტილების მიღებისას ვიმოქმედებთ მხოლოდ არსებული მასალისა და განწყობების მიხედვით", - დასძინა დეპუტატმა და არ გამორიცხა, რომ საკითხთან დაკავშირებით საზოგადოებაში განსხვავებული მოსაზრებები შეიძლება გაჩნდეს.
შეგახსენებთ, რომ ქართველი მეცნიერები რუსეთის იმპერიის მიერ ჩერქეზების მიმართ განხორციელებულ ქმედებებს გენოციდის კვალიფიკაციას ანიჭებენ. ამის შესახებ ნათქვამია სამეცნიერო დასკვნაში, რომელიც ქართველი მეცნიერებით დაკომპლექტებულმა ჯგუფმა წელიწადნახევრიანი კვლევის შემდეგ მოამზადეს.
