კახეთის საინფორმაციო ცენტრის ინფორმაციით, საინგილოში მცხოვრები ქართველები აზერბაიჯანში საქართველოს ელჩის თეიმურაზ შარაშენიძის მოხსნის მოთხოვნით, საქართველოს საგარეო საქმეთა მინისტრის გრიგოლ ვაშაძის სახელზე ხელმოწერებს აგროვებენ.
ჰერები თეიმურაზ შარაშენიძეს შეურაცხყოფაში და მათი პრობლემების იგნორირებაში ადანაშაულებენ. ზაქათალის რაიონის სოფელ ალიაბადის მაცხოვრებლების თქმით, 18 აპრილს, ელჩი და მისი მოადგილე გელა გიორგაძე ალიაბადში ჩავიდნენ. ელჩი ნასვამ მდგომარეობაში იმყოფებოდა და ალიაბადის მაცხოვრებლებს, რომლებიც სოფელში ქართული სკოლისა და ბაღის გახსნას ითხოვენ, შეურაცხყოფა მიაყენა. „ელჩმა ზაქათალის რაიონის ხელისუფლების წარმომადგენლების თანდასწრებით გვითხრა, ჯერ გაარკვიეთ ქართველები ხართ თუ აზერბაიჯანელები და ქართული სკოლისა და ბაღის გახსნა მერე მოითხოვეთო", - აღნიშნეს ალიაბადის მაცხოვრებლებმა.
ჰერების მოთხოვნასთან დაკავშირებით საქართველოს საგარეო საქმეთა სამინისტროს პრესცენტრში კომენტარი არ გააკეთეს. კახეთის საინფორმაციო ცენტრი არაერთხელ შეეცადა აზერბაიჯანის რესპუბლიკაში საქართველოს საელჩოსთან დაკავშირებას, თუმცა საქართველოს საგარეო საქმეთა სამინისტროს ვებგვერდზე მითითებულ ნომრებზე არავინ უპასუხა.
კახეთის საინფორმაციო ცენტრი ზაქათალის რაიონის სოფელ ალიაბადიდან რეპორტაჟს ორშაბათს შემოგთავაზებთ.
