საქართველოს საგარეო საქმეთა მინისტრი გრიგოლ ვაშაძე ჩრდილოკავკასიელ მებრძოლთა ლიდერის, დუკუ უმაროვის პანკისის ხეობაში „დამალვას" კატეგორიულად უარყოფს.
„რუსეთის სამართალდამცველები უსუსურები არიან საკუთარ ტერიტორიაზე დაამყარონ მშვიდობა. ამის გამო ყველგან საფრთხეს ელანდებათ, განსაკუთრებით ის, სადაც ეს საფრთხე არ არის", - განუცხადა ვაშაძემ ჟურნალისტებს რუსული მედიით გავრცელებულ შესაბამის ინფორმაციაზე კომენტირებისას.
ამასთან, მისივე აზრით, „რუსული მედიით გავრცელებულ ინფორმაციებს, საგარეო საქმეთა სამინისტროს განცხადება კი არა, სამედიცინო დასკვნა სჭირდება".
„როცა რუსულ პრესაში რაიმე იწერება, ამაზე საგარეო საქმეთა სამინისტროს კი არა, ფსიქიატრებს უნდა მიმართოთ, რადგან ამას სჭირდება სამედიცინო დიაგნოზი", - მიმართა საქართველოს საგარეო საქმეთა მინისტრმა ჟურნალისტებს.
შეგახსენებთ, რომ რუსული მედიის მტკიცებით, დუკუ უმაროვი პანკისის ხეობაში იმალება.
