რუსეთის სპეცსამსახურების წარმომადგენელთა აზრით, სავარაუდოდ, ჩრდილოკავკასიელ მებრძოლთა მეთაური, რუსეთის ფედრაციის ტერიტორიაზე ნომერ პირველ ტერორისტად გამოცხადებული დოკუ უმაროვი საქართველოს ტერიტორიაზე, კერძოდ, პანკისის ხეობაში იმალება. ინფორმაციას ამის შესახებ რუსული მედია ავრცელებს.
დოკუ უმაროვის დაჯგუფების ლიკვიდაციის შესახებ ინგუშეთის ტერიტორიაზე რუსულმა მედიამ ინფორმაცია ჯერ კიდევ, მიმდინარევ წლის მარტში გაავრცელა. მაშინ ვარაუდობდნენ, რომ უმაროვი გარდაცვლილი იყო, თუმცა მოგვიანებით დნმ-ის ანალიზმა რუსეთის სპეცსამსახურების ეს ვარაუდი არ დაადასტურა.
"მაშინდელი დღიდან უმაროვი უკვალოდ გაქრა. ამჟამად მისი კვალი მოულოდნელად თურქეთში გამოჩნდა, მისი ძმის ვახას ბინაში. თუმცა ესეც არ არის დასასტურებული, წინააღმდეგ შემთხვევაში უმაროვი თურქული სპეცსამსახურების ყურადღების ქვეშ აღმოჩნდებოდა და მას დააპატიმრებდნენ. უმაროვი ვერც სხვა ევროპულ ქვეყანაში გაემგზავრებოდა, ვინაიდან იგი ამერიკელების "შავ სიაში" იმყოფება", _ აცხადებს რუსეთის უსაფრთხოების ფედერალური სამსახურის სამმართველოს წარმომადგენელი დიმიტრი მალოვი.
მისივე თქმით, ყველაზე სავარაუდოა, რომ უმაროვი ამჟამად საქართველოს ტერიტორიაზე პანკისის ხეობას აფარებს თავს. "მისთვის აუცილებელია სამედიცინო დახმარება, ვინაიდან არის ინფორმაცია, რომ უმაროვი დაჭრილია. პანკისის ხეობაში კი ბოევიკების ჰოსპიტლებია განთავსებული სადაც ისინი მკურნალობენ და რეაბილიტაციის კურსს გადიან. შესაძლოა სწორედ ერთ-ერთ ასეთ ბანაკში დოკუ უმაროვი იმყოფებოდეს.
