საქმიანი, სასარგებლო და საერთაშორისო ასპარეზზე პარტიის საქმიანობის მნიშვნელოვან წინგადადგმულ ნაბიჯად შეაფასა ლეიბორისტული პარტიის საერთაშორისო მდივანმა, ნესტან კირთაძემ კიევსა და ალმაატაში ვიზიტი.
2-3 მაისს, ალმაატაში გაიმართა სოციალისტური ინტერნაციონალის შავი ზღვის აუზის, დსთ-სა და სამხრეთ კავკასიის ქვეყნების რეგიონალური კომიტეტის სხდომა, რომელშიც მონაწილეობდნენ: სოციალისტური ინტერნაციონალის გენერალური მდივანი ლუის აიალა, ქალთა სოცისლიტური ინტერნაციონალის გენერალური მდივანი მარლენ ჰასი, აგრეთვე, გერმანიის, საბერძნეთის, უნგრეთის, შვედეთის წარმომდაგნელობა.
რეგიონალური კომიტეტის სხდომამ ორ დღიან გადატვირთულ რეჟიმში იმუშავა და დღის წესრიგის მთავარ საკითხებად წარმოადგინა მონაწილე ქვეყნებში არსებული მიმდინარე პოლიტიკური პროცესები და რეზოლუცია-რეგიონალური კონფლიქტების შესახებ.
საქართველოს ლეიბორისტული პარტიის საერთაშორისო მდივანი, ნესტან კირთაძე სპეციალური მოხსენებით სხდომაზე ორჯერ წარსდგა, რომელთაგან, პირველი ეხებოდა საქართველოში მიმდინარე ურთულეს რეალურ სოციალურ და პოლიტიკურ ვითარებას და იმ გამოწვევებს, რომლის წინაშეც ახლა დგას ქართველი ხალხი და დაშლილი ქართული სახელმწიფო, აგრეთვე, ისაუბრა ერთ-ერთი ყველაზე მთავარი გამოწვევის - არსებული ხელისუფლების შეცვლის საკითხზეც, აქვე, მსოფლიოს სხვადასხვა ქვეყნის წარმომადგენელებს წარუდგინა და გადასცა ლეიბორისტული პარტიის ის საარჩევნო პრინციპები, რომლის მიზანია ძალაუფლების ხალხისათვის გადაცემა და რომლის გარეშეც საქართველოში თავისუფალი არჩევნები არ შედგება, რასაც სხდომის მონაწილე ქვეყნების წარმომადგენელების საქმიანი დისკუსია და გულწრფელი მხარდაჭერა მოჰყვა.
რეგიონალური კონფლიქტების საკითხთან დაკავშირებით გაკეთებული სპეციალური მოხსენების შემდეგ ნესტან კირატძე გამოვიდა ინიციატივით, რომ უახლოეს მომავალში სოციალისტური ინტერნაციონალის ეგიდით თბილისში გაიმართოს საკონსულტაციო შეხვედრა, რომელშიც მონაწილეობას მიიღებენ რუსეთის ფედერაციის, აფხაზეთის და ცხინვალის რეგიონის პოლიტიკური წრეების წარმომადგენლები.
"ეს უნდა იყოს საკონსულტაციო შეხვედრა, რომლის დასრულების შემდეგ ჩვენ უნდა შევქმნათ რეალური სურათი, რა სიღრმემდე შევდივართ საქართველოს სახელმწიფოებრივი და ტერიტორიული გამთლიანებისათვის ბრძოლაში. ჩვენ არ უნდა გავაჩინოთ ყალბი მოლოდინები, მაგრამ ვალდებულნი ვართ გადავდგათ პირველი და სერიოზული ნაბიჯები კონფლიქტურ მხარეებთან პირდაპირი სამშვიდობო დიალოგის დასაწყებად", _ განაცხადა ნესტან კირთაძემ.
ინიციატივას მხარი დაუჭირა სოციალისტური ინეტრნაციონალის გენერალურმა მდივანმა ლუის აიალამ და რეგიონალური კომიტეტის სხოდმის ყველა მონაწილე ქვეყანამ.
ალმაატის შეხვედრამ სწორედ ასეთი რეზოლუცია მიიღო და წლის ბოლომდე თბილისში სოცინტერნის პატრონაჟით და გენერალური მდივნის პირადი მონაწილეობით გაიმართება საკონსულტაციო სხდომა, რომელშიც მონაწილეობას მიიღებენ კონფლიქტის მხარეები და აგვისტოს სისხლიანი მოვლენების შემდეგ პირველად თბილისში ჩამოვლენ რუსეთის ფედერაციის პოლიტიკური წრეების წარმომადგენლები.
მნიშვნელოვანს უწოდებს ნესტან კირთაძე კიევში მის ხანმოკლე ვიზიტსაც, სადაც საინტერესო შეხვედრები შედგა უკრაინის პოლიტიკური წრეების წარმომადგენლებთან, აგრეთვე, კიევში მცხოვრებ სტუდენტ-ახალგაზრდებთან და საქმიანი წრეების წარმომადგნელებთან. ნესტან კირათაძე კიევის პეჩორის ლავრაში გამართულ წირვასაც დაესწრო; და 5 მაისს საქმიანი ვიზიტი კიევსა და ალმაატაში დაასრულა.