ჰააგის საერთაშორისო სისხლის სამართლის სასამართლო ამ კვირაში ლიბიის ხელისუფლების ხუთი წევრის მიმართ დაჭერის ორდერს გასცემს. მათ შორის, ორდერი მუამარ კადაფისა და მისი ვაჟის სეიფ ალ-ისლამის დასაჭერად გაიცემა. ამის შესახებ ტელეარხი Al Arabiya იტყობინება, რომელსაც მთავარი პროკურორის ლუის მორენ-ოკამპოს ანგარიში ხელთ ჩაუვარდა.
დაჭერის ორდერში, ასევე, ლიბიის საგარეო საქმეთა სამინისტროს ექს-ხელმძღვანელის მუსა კუსას სახელიც ჩაიწერება, რომელიც დიდ ბრიტანეთში გაიქცა. ამასთან, დაჭერა ემუქრება ლიბიის ხელისუფლების საგარეო უსაფრთხოების სამსახურის დურექტორ აბუ ზეიდ ომარ დურდაჰს, რომელიც, შესაძლოა, ამჟამად ტუნისში იმალებოდეს.
უფრო ადრე გავრცელებული ინფორმაციით, ჰააგის სასამართლოს შესაბამისი მტკიცებულებები მოეპოვება, რომლის მიხედვითაც, სანამ ლიბიაში სამოქალაქო ომი გაჩაღდებოდა, ლიბიის ხელისუფლება სახალხო მღელვარების ჩახშობას ისედაც აპირებდა და საკუთარი მოსახლეობის დახოცვასაც გეგმავდა.
საინტერესოა, რომ ლიბიის ხელისუფლება ტუნისის სცენარის განმეორებას გაურბოდა, სადაც საპროტესტო გამოსველებმა რეჟიმის დაცემა განაპირობა.
მოსალოდნელია, რომ მორენო-ოკამპო თავის ანგარიშს გაეროს უშიშროების საბჭოს ხუთშაბათს წარუდგენს.
შეგახსენებთ, ლიბიაში შექმნილი სიტუაციის საერთაშორისო სასამართლოსთვის გადაცემა 2011 წლის 26 თებერვლიდან შემუშავებული გაეროს უშიშროების საბჭოს რეზოლუციის საფუძველზე მოხდა. უფრო ადრე, მუმარ კადაფის ვაჟმა განაცხადა, რომ მამამისს საერთაშორისო სასამართლო არ აფრთხობდა და, რომ ლიბიის ხელისუფლება ტერორისტებთან ბრძოლას არ შეაჩერებდა.
