ფეხბურთელების საქმესთან დაკავშირებით საქართველოს ფეხბურთის ფედერაცაში საგანგებო ბრიფინგი დაინიშნა. ფედერაციის პრეზიდენტი ზვიად სიჭინავა ფეხბურთელების მიერ თამაშების გაყიდვის ფაქტს გმობს.
"ბოლო ერთი წელიწადია, ვებრძვით სამსაჯო კომიტეტს, რათა გამოვავლინოთ ის მსაჯები, რომლებიც მოლაპარაკებაში შედიან. თურმე ჩვენი ფეხბურთელები ყოფილან ერთმანეთში მოლაპარაკებულები; იციან, რამდენი აუტი იქნება, რამდენი "ყვითელი" და რომელ წუთზე ვის როგორ გამოცვლიან", _ აცხადებს სიჭინავა.
მისი თქმით, ფეხბურთის ფედერაციამ უეფასა და ფიფას სახელზე უკვე გაამზადა წერილი, რომლითაც ამ ორგანიზაციებს მომხდარის შესახებ შეატყობინებენ და მხოლოდ ამის შემდეგ მიიღებენ მკაცრ ზომებს.
სიჭინავა ვარაუდობს, რომ დანაშაული მხოლოდ 4-5 ფეხბურთელით არ შემოიფარგლება და საქმეში გუნდებიც იქნებიან ჩართულნი. ამდენად, ფეხბურთის ფედერაციის პრეზიდენტი გამოძიების დასრულებას დაელოდება.
"მიმაჩნია, ფეხბურთელი, რომელიც მზადაა, გაყიდოს თავისი კლუბი, თამაში, გაყიდის თავის ქალაქსა და ქვეყანას", _ აცხადებს სიჭინავა.
მან იტალიაში თამაშების გაყიდვის გამო ფეხბურთელის დაკავების ფაქტიც გაიხსენა, რომელიც ორი წლის განმავლობაში იჯდა ციხეში.
სიჭინავას თქმით, ყველაზე სასტიკ გადაწყვეტილებას, რაც უეფასა და ფიფას რეგლამენტით იქნება გათვალისწინებული, მიუყენებენ ყველა იმ ფეხბურთელს, რომელიც ამ სკანდალში იქნება ჩართული.
შეგახსენებთ, კონსტიტუციური უსაფრთხოების დეპარტამენტის თანამშრომლებმა ტოტალიზატორების შავი ბიზნესის წამომადგენლებთან საქართველოს ეროვნულ ჩემპიონატში მონაწილე საფეხბურთო კლუბების კორუფციული გარიგებები გამოავლინეს. მომხდარის გამო საფეხბურთო კლუბ 'სამტრედიის", ზუგდიდის 'ბაიას", თბილისის 'ვიტ-ჯორჯიას" ფეხბურთელები დააკავეს.
