დღეს, 2 მაისს, პარლამენტის ბიურო სხვა მნიშვნელოვან საკითხებთან ერთად აუდიტორულ კომპანიებზე საგადასახადო უფლების დელეგირების შესახებ იმსჯელებს. "საგადასახადო კოდექსში" შესატანი ცვლილებები უკვე მზადაა და განსახილველად პარლამენტშია წარდგენილი.
კანონპროექტის თანახმად, საგადასახადო ადმინისტრირება კერძო სამართლის იურიდიული პირების საშუალებით განხორციელება, რაც ამ უკანასკნელსა და საგადასახადო ორგანოს შორის დადებული ხელშეკრულების საფუძველზე მოხდება.
კანონპროექტის განმარტებით ბარათში ნათქვამია, რომ საგადასახადო კოდექსში განხორციელებული ცვლილებების საშუალებით ცალკეული სახის საგადასახადო ადმინისტრირებას და საგადასახადო კონტროლს უზრუნველყოფენ კერძო სამართლის იურიდიული პირები, შედეგად კი მოხდება შრომითი და სხვა რესურსების ოპტიმალურად გამოყენება. ხოლო ცალკეული სახის საგადასახადო კონტროლის პროცედურები განხორციელდება საგადასახადო სანქციების გამოყენების გარეშე, რაც თავის მხრივ უზრუნველყოფს საგადასახადო სერვისის გაუმჯობესებასა და მეწარმეებისათვის საგადასახადო გარემოს სრულყოფას.
ფინანსთა სამინისტროს ინფორმაციით, შემოსავლების სამსახური ბიზნესსექტორს სთავაზობს სიახლეს საგადასახადო შემოწმების კუთხით, რაც ითვალისწინებს დამოუკიდებელი აუდიტორული კომპანიების ჩართვას ამ პროცესში, რაც სახელმწიფოსა და კერძო სექტორს შორის თანამშრომლობისა და ნდობის ხელშეწყობისთვის ერთ-ერთი მნიშვნელოვანი ნაბიჯია.
ამიერიდან საგადასახადო რისკის დაფიქსირების შემთხვევაში, გადამხდელს ეცნობება შემოწმების თაობაზე და მას უფლება ექნება, თავად გადაწყვიტოს შემოწმება ჩაატაროს შემოსავლების სამსახურმა თუ დამოუკიდებელმა აუდიტორულმა თუ საკონსულტაციო კომპანიამ.
აღსანიშნავია, რომ გადამხდელს გარე აუდიტის მომსახურების შემთხვევაში, შემოწმებული პერიოდი შემოსავლების სამსახურშიც შემოწმებულ პერიოდად ჩაეთვლება. კერძო აუდიტორული ან საკონსულტაციო კომპანიის არჩევის შემთხვევაში, გადამხდელი აღმოჩენილი დარღვევის ჯარიმისგან ნაწილობრივ თავისუფლდება.
სამინისტროს ინფორმაციით, ერთი წლის განმავლობაში, დამოუკიდებელი აუდიტორული კომპანიები გადამხდელებთან იმუშავებენ თავისი მეთოდოლოგიით და შემოწმების პროცედურებით. ამ პერიოდში მუდმივმოქმედი კომისია, რომელიც დაკომპლექტდება შემოსავლების სამსახურის, აუდიტორული კომპანიების წარმომადგენლებისა და მოწვეული ექსპერტებისგან, შეიმუშავებს შემოწმების მეთოდურ სახელმძღვანელოს.
საგადასახდო სფეროში არსებული სიახლეები, 13 აპრილს პრემიერ-მინისტრმა ნიკოლოზ გილაურმა ბიზნესმენებს შემოსავლების სამსახურის უფროსთან ერთად გააცნო. მაშინ პრემიერ-მინისტრმა აღნიშნა, რომ ახალი ინიციატივა მისაღები იქნება როგორც კერძო სექტორისთვის, ასევე უშუალოდ აუდიტორული კომპანიებისთვის.
შემოსავლების სამსახურის უფროსი აცხადებს, საგადასახდო უფლებების დელეგირება აუდიტორულ ბიზნესზე მნიშვნელოვანია, როგორც კერძო სექტორისთვის, ასევე თავად შემოსავლების სამსახურისთვის, რათა ამ უკანასკნელმა საკუთარი ადამიანური რესურსი სხვა მიმართულებითაც გადაანაწილოს.
მთავრობა ამბობს, რომ საგადასახადო შემოწმებისათვის აუდიტორულ თუ საკონსულტაციო კომპანიებს ტარიფს არ განუსაზღვრავს და მას თავად ბაზარი განსაზღვრავს.
იმავდროულად ცნობილი ხდება, რომ კერძო სექტორისთვის აუდიტორული კომპანიის მიერ ჩატარებული შემოწმება მომგებიანი იმ კუთხითაც, რომ ასეთ შემთხვევაში კომპანიას ყველა ჯარიმა არ დაერიცხება და ზოგიერთი ჯარიმის ჩამოწერა მოხდება.
პრემიერ-მინისტრის თქმით, აუდიტორული კომპანიების მიერ შემოწმებულ კომპანიებს ჯარიმების ნაწილი არ დაერიცხება.
"თუ კომპანიას აუდიტორი შეამოწმებს, მას ჯარიმების ნაწილი ჩამოეწერება,
თუ კომპანიას შეამოწმებს საგადასახადო სამსახური, მას ჯარიმა ჩვეულებრივად დაერიცხება. გვინდა, მეტი მოტივაცია მივცეთ კერძო სექტორს, რათა ახალი ინიციატივა რაც შეიძლება მალე გამოიყენონ", - აღნიშნა პრემიერ-მინისტრმა.
ბიზნესი კი აცხადებს, რომ საგადასახადო შემოწმებისთვის კერძო სექტორის ნაწილს დამატებითი ხარჯის გაწევა უღირს, თუ კი ეცოდინებათ, რომ მათ მიერ უნდობლობა გამოცხადებულ საგადასახადო ინსპექტორებთან არ ექნებათ ურთიერთობა.
