საზოგადოებრივი მოძრაობა "დაიცავი საქართველო" სანდრო გირგვლიანის საქმეზე სტრასბურგის სასამართლოს გადაწყვეტილებას ეხმაურება. როგორც მოძრაობა მიიჩნევს, გირგვლიანის საქმეზე სტრასბურგის სასამართლოს გადაწყვეტილება საქართველოს მოსახლეობის სამართლიანობისთვის ბრძოლის გზაზე დიდი გამარჯვების რეალური დასაწყისია.
"სანდრო გირგვლიანის გმირული ტრაგედია არის და რჩება მკაფიო წყალგამყოფად სიკეთესა და ბოროტებას შორის. გირგვლიანმა ყველა ჩვენგანის ღირსება საკუთარი სიცოცხლის ფასად დაიცვა მოძალადე, ავზნიანი ხელისუფლების პირისპირ. მოვალენი ვართ, დაწყებული ბრძოლა ბოლომდე მივიყვანოთ საქართველოში სამართლიანობ აღსადგენად", - აცხადებს "დაიცავი საქართველო".
სტრასბურგის სასამართლოს გადაწყვეტილება ცნობილი დღეს გახდა. სტრასბურგის სასამართლომ დარღვეულად ცნო ევროკონვენციის მეორე მუხლი, რომელიც სიცოცხლის უფლების პატივისცემას ითვალისწინებს. ევროსასამართლომ მიუთითა, რომ გამოძიება, რომელიც წარიმართა საქართველოს შიდა ინსტანციაში - შსს-ში, პროკურატურაა და სასამართლოში, არ შეესაბამებოდა ევროკონვენციის მეორე მუხლის სტანდარტებს. სასამართლომ დარღვეულად ცნო ევროკონვენციის 38-ე მუხლი, რომელიც ითვალისწინებს სახელმწიფოს ვალდებულებას, ითანამშრომლოს სასამართლოსთან ფაქტების დადგენაში. საქართველოს მთავრობის მიერ გარკვეული მტკიცებულებები წარდგენილი იყო დაგვიანებით, ხოლო გარკვეული მტკიცებულებები - გაყალბებული სახით. სასამართლომ მიიჩნია, რომ სიცოცხლის უფლებასთან დაკავშირებით პრეტენზიები სრულად ასახავდა იმ პრეტენზიებს, რომელიც სამართლიან სასამართლოსთან დაკავშირებით შეიძლებოდა ყოფილიყო და სამართლიანი სასამართლოს უფლების დარღვევაზე ცალკე არ უმსჯელია.
ევროსასამართლომ საქართველოს სახელმწიფოს დააკისრა, სამი თვის ვადაში მოსარჩელე გურამ გირგვლიანის სასარგებლოდ გადაიხადოს 50 ათასი ევრო.
