"სანდრო გირგვლიანის საქმეზე სტრასბურგის სასამართლოს გადაწყვეტილება უმძიმესი განაჩენია საქართველოს დღევანდელი ხელისუფლებისთვის, რომლის ყველა ოფიციალურ სტრუქტურას - დაწყებული საქმის მოკვლევაში ჩართული შსს-ის ყველაზე დაბალი ჩინის მქონე ადამიანებით, დამთავრებული პრეზიდენტით - ამ დანაშაულის მიმართ სრულიად უსამართლო, უზნეო, არაადამიანური პოზიცია ჰქონდა", - ასე აფასებენ "ახალი მემარჯვენეები" გირგვლიანის საქმესთან დაკავშირებით სტრასბურგის სასამართლოს განაჩენს.
"ცხადია, ხელისუფლებას ექნება მცდელობა სტრასბურგის სასამართლოს გადაწყვეტილებასთან დაკავშირებით პოზიცია გამოხატოს და თავი იმართლოს. ვფიქრობთ, ისინი უნდა ხვდებოდნენ, რომ არ ღირს: ამით თავინათ ისედაც მძიმე დანაშაულს კიდევ უფრო დაამძიმებენ. მიუხედავად იმისა, აღიარებს თუ არა ამას, დღეს ხელისუფლებას მოუწევს პასუხი გასცეს საზოგადოებას, თუ რატომ არ აღსრულდა სამართლიანი მართლმსაჯულება ქვეყანაში, რატომ აღმოჩნდა ჩვენი სახელმწიფო ტოლერანტული სიცოცხლისთვის საშიში მოქმედებების მიმართ, ასევე იმ ადამიანების მიმართაც, ვინც დანაშაულს სჩადის და დამნაშავეებს მფარველობს", - ნათქვამია განცხადებაში.
"ახლების" შეფასებით, სტრასბურგის სასამართლომ კიდევ უფრო ნათლად გამოკვეთა იმ ადამიანების პასუხისმგებლობა, ვინც მათ მფარველობდა და ესენი ერთმნიშვნელოვნად ხელისუფლების ყველაზე მაღალი რანგის პასუხისმგებელი პირები - ქვეყნის პრეზიდენტი, შინაგან საქმეთა მინისტრი, გენერალური პროკურორი, უზენაესი სასამართლოს თავმჯდომარე არიან.
"სტრასბურგის სასამართლოს ამ გადაწყვეტილებამ საერთაშორისო სამართლის თვალსაზრისით შექმნა სამართლებრივი საფუძველი, იმისთვის, რომ უახლოეს მომავალში აღსრულდეს მართლმსაჯულება და უმძიმესი სახელმწიფო და მორალური დანაშაულისთვის პასუხი აგონ არა მარტო ამ დანაშაულის დამკვეთებმა და შემსრულებლებმა, არამედ ყველა იმ თანამდებობის პირმა, რომლებიც მაათ მფარველებად მოგველინნენ", - აღნიშნულია განცხადებაში.
