რუსეთსა და საქართველოს შორის მოლაპარაკებათა საბოლოო შედეგი აფხაზეთისა და ცხინვალის რეგიონის ე.წ. დამოუკიდებლობის აღიარების გაუქმება და რუსეთის ჯარის გაყვანაა. ეს განცხადება საქართველოს საგარეო საქმეთა მინისტრმა გრიგოლ ვაშაძემ ჟურნალ "ოგონიოკისათვის" მიცემულ ინტერვიუში გააკეთა კითხვაზე პასუხის გაცემისას თუ რა კომპრომისზე შეიძლება წავიდეს საქართველო იმ სიტუაციის დასაბრუნებლად, რომელიც 2008 წლის აგვისტომდე იყო.
"რუსეთის ჯარის გაყვანა და აფხაზეთისა და ცხინვალის რაიონის ე.წ. დამოუკიდებლობის აღიარება - ეს მოლაპარაკებათა საბოლოო შედეგია. იმისათვის, რომ საბოლოო შედეგს მივაღწიოთ ჩვენ უნდა ვისაუბროთ მაინც. გაიხსენეთ, კლასიკოსი - შეთანხმება არის პროდუქტი მხარეების მიერ წინააღმდეგობის არ გაწევისა. იმისათვის, რომ საბოლოო პროდუქტს მივაღწიოთ არ არის საჭირო მოლაპარაკებებისათვის წინააღმდეგბის გაწევა", _ აცხადებს გრიგოლ ვაშაძე და დასძენს, რომ იგი დარწმუნებულია, რომ საქართველოსა და რუსეთს შორის მოლაპარაკებები აუცილებლად დაიწყება.
"ისინი აუცილებლად დაიწყება, არ ვიცი სად და როდის, არ ვარ დარწმუნებული, რომ მათ სწორედ ლავროვი და ვაშაძე გამართავენ. შესაძლოა, მოლაპარაკება დაიწყონ მათ ვინც ჩვენ ამ თანამდებობებზე შეგვცვლის, მაგრამ ამას არა აქვს არავითარი მნიშვნელობა. თუმცა რუსეთს ადრე თუ გვიან მოუწევს საქართველოსთან თანასწორუფლებიანობის საფუძველზე საუბარი, ერთი უბრალო მიზეზია გამო - ყველგან სადაც რუსეთი დღეს მიდის და რა საერთაშორისო პრობლემასაც არ უნდა განიხილავდეს იგი ყველგან და ყოველთვის მოსკოვის და სამწუხაროდ თავს იჩენს საქართველოს საკითხი. ესაა მსოფლიო სავაჭრო ორგანიზაციაც, ესაა ევროპაში ჩვეულებრივი შეიარაღების შეზღუდვის შესახებ შეთანხმება, ესაა ღია ცა და ნდობის ზომები და სხვათაშორის ბატონი მედვედევის იდეა ევროპაში უსაფრთხოებისა და სტაბილურობის ახალი არქიტექტურის შესახებ", _ აცხადებს გრიგოლ ვაშაძე.
