"საქართველოს არც მოტივაცია აქვს და არც განსაკუთრებული სურვილი რუსეთის ბაზარი რაიმე ფორმით მისი პროდუქციით დააინტერესოს", - ასე გამოეხმაურა საქართველოს საგარეო საქმეთა მინისტრის მოადგილე ნინო კალანდაძე რუსეთის მთავარი სანიტრის, გენადი ონიშენკოს განცხადებას.
როგორც დღეს გამართულ ბრიფინგზე კალანდაძემ განაცხადა, თუ რუსეთის ტერიტორიაზე აკრძალული პროდუქცია რაიმე სახით შედის, ეს მოსკოვის პრობლემაა და იმაზე მეტყველებს, რომ რუსეთი საკუთარ საზღვრებს სათანადოდ ვერ აკონტროლებს.
"ჩვენ ვემორჩილებით ემბარგოს. არც მოტივაცია გვაქვს და არც განსაკუთრებული სურვილი, რაიმე ფორმით აღვადგინოთ და დავაინტერესოთ ეს ბაზარი საქართველოს პროდუქციით. მათი პრობლემაა, თუ რუსეთის ფედერაცია ვერ ახერხებს საკუთარი საზღვრების სათანადო კონტროლს",- განაცხადა კალანდაძემ.
