საქართველოს საგარეო საქმეთა სამინისტრო არ გამორიცხავს, რომ თბილისმა მოსკოვის წინააღმდეგ საერთაშორისო სასამართლოს ისევ მიმართოს.
"საერთაშორისო სასამართლომ გადაწყვეტილება უკვე მიიღო და საქართველოს სარჩელის განხილვა ამ ეტაპზე აღარ გაგრძელდება, მაგრამ ეს გადაწყვეტილება ჩვენს საქმიანობას არ აფერხებს. რუსეთთან, მართალია შუამავლების მეშვეობით, მაგრამ მუდმივი მოლაპარაკების რეჟიმში ვიმყოფებოდით და ეს პროცესი გრძელდება. იმედი გვაქვს ჩვენი დიპლომატიური მცდელობა ადრე თუ გვიან შედეგს გამოიღებს. წინააღმდეგ შემთხვევაში, რასაკვირველია, ქართული მხარე არ გამორიცხავს, რომ საერთაშორისო სასამართლოს ისევ მიმართოს", - განუცხადა საქართველოს საგარეო უწყების ხელმძღვანელის მოადგილე ნინო კალანდაძემ ჟურნალისტებს.
ამასთან, მისივე განმარტებით, სასამართლოს მიერ მიღებულ გადაწყვეტილებასთან დაკავშირებით რამდენიმე ევროპელმა მოსამართლემ ქართული მხარის ინტერესების შესაბამისი მოსაზრება დაწერა და ამ კუთხით გერმანელი მოსამართლე გამოყო.
"გერმანელი მოსამართლის დასკვნაში ქართული მხარის მოთხოვნებია მხარდაჭერილი და ის პოზიციები, რასაც ჩვენ სასამართლო განხილვების პროცესში ვახმოვანებდით, არგუმენტირებულად დასაბუთებული. სასამართლოსგან განსხვავებული დასკვნა გამოაქვეყნა კიდევ რამდენიმე ევროპელმა მოსამართლემ, რაც ძალიან მნიშვნელოვანია", - აღნიშნა კალანდაძემ.
შეგახსენებთ, რომ ჰააგის საერთაშორისო სასამართლომ რუსეთის წინააღმდეგ საქართველოს სარჩელის არსებით განხილვაზე უარი თქვა. სასამართლო მიიჩნევს, რომ მხარეებს მოლაპარაკებათა რესურსი სრულად არ ამოუწურავთ და დავის მართლმსაჯულების მიერ გადაწყვეტამდე თბილისსა და მოსკოვს მისი დიალოგის გზით მოგვარება ურჩია.
