"ხარჯებისა და დეფიციტის დინამიკა მიუთითებს მთავრობის პოლიტიკაზე, გამოვიდეს ფისკალური სტიმულირებისგან. როგორც კი იანვარ-თებერვალ-მარტის შედეგები გვექნება, გადავხედავთ მაკროეკონომიკურ პრობლემებს. ამის შემდგომ უკვე შესაძლებელობა მოგვეცემა, ფისკალური დეფიციტი კიდევ უფრო შევამციროთ და 4,3 პროცენტის ნაცვლად 5 პროცენტზე ქვემოთ ჩამოვიდეთ",_აღნიშნა სამთავრობო დებატებზე პარლამენტში გამოსვლისას ფინანსთა მინისტრმა კახა ბაინდურაშვილმა.
მისი განმარტებით, ჩვენი სიძლიერე დეფიციტური ხარჯების სტრუქტურაში მდგომარეობს, რადგან ის დამისამართებულია კაპიტალურ ხარჯზე, ეკონომიკისთვის გრძელვადიანი ზრდის მომტან ღონისძიებებზე.
ბაინდურაშვილი მიიჩნევს, რომ მიმდინარე სოციალური ხარჯებისგან განსხვავებით, ამ ტიპის ხარჯების შემცირება გაცილებით უფრო იოლია.
"ეს მიუთითებს მთავრობის ჯანსაღ და მტკიცე პოლიტიკაზე, რომელიც დიდი ცდუნების მიუხედავად, პოპულიზმს არ აყვა და, განსაკუთრებით 2009 წელს, ჭარბი დეფიციტური შემოსულობები არ მიმართა სხვადასხვა ვალდებულებების ზრდაზე",_განმარტა ბაინდურაშვილმა.
"მთლიან შიდა პროდუქტთან პროცენტული შეფარდებით, შევზღუდეთ სახელმწიფო ბიუჯეტის ხარჯები, რამაც ბუნებრივია, შემდგომში უკვე მოგვცა საშუალება, რომ დეფიციტი საგრძნობლად შეგვემცირებინა. პრაქტიკულად, შესაძლებელია, რომ ამ წლის ბოლოსთვის ის 4 პროცენტსაც კი ჩამოხდეს",_აცხადებს ბაინდურაშვილი.
ბაინდურაშვილის თქმით, გაცხადებული პოლიტიკის შესაბამისად, 2013 წლისთვის დეფიციტის შემცირება დაგეგმილი გვაქვს, რათა იგი არ აღემატებოდეს 3 პროცენტს.
შეგახსენებთ, დღეს საქართველოს პრემიერ-მინისტრი ნიკოლოზ გილაური და მთავრობის წევრები საკანონმდებლო ორგანოში სამთავრობო დებატებზე იმყოფებიან.
