ტელეკომპანია "მაესტროს" გენერალური დირექტორი მამუკა ღლონტი ჟურნალისტების ეთიკის ქარტიას იწუნებს და არ ეურთდება.
როგორც ღლონტმა "ჯი-ეიჩ-ენს" განუცხადა, "ქარტია იგივეა, ცირკის წინ დგომა რომ აუკრძალო იმ ქალბატონებს, რომლებიც ამას უკვე მიჩვეულნი არიან".
"ამ ქარტიას არ შევუერთდებით. ეს საბავშვო თამაშად მეჩვენება.
იქ რაც წერია, ეს ისედაც ისე უნდა იყოს, მას ხელმოწერა არ სჭირდება. ის ჟურნალისტები კი, რომლებიც იტყუებიან და მალავენ სწორ ინფორმაციას, ქარტიაზეც მოაწერენ ხელს და დედასაც დაიფიცებენ, რომ ობიექტურები იქნებიან, მაგრამ პრაქტიკაში მაინც ტენდენციურად მოიქცევიან", - განუცხადა ღლონტმა "ჯი-ეიჩ-ენს".
შეგახსენებთ, რომ ჟურნალისტები ეთიკის ქარტიას ხელს 4 დეკემბერს მოაწერენ. ხელმოწერის ღონისძიება თბილისში, სასტუმრო "რედისონში" შედგება.
ჟურნალისტური ეთიკის ქარტია 11 პუნქტს შეიცავს. ტექსტზე ხელმოწერა ინდივიდუალურია და პასუხისმგებლობაც იმ ჟურნალისტებს ეკისრებათ, რომლებიც ქარტიით გათვალისწინებულ პრინციპებს დაარღვევენ. ქარტიაზე ხელმომწერი ჟურნალისტების მიერ გამოქვეყნებული მასალების მონიტორინგს სპეციალური საბჭო განახორციელებს, რომელიც 9 ადამიანისგან შედგება. საბჭოს წევრებს ჟურნალისტები აირჩევენ. საბჭოში 3 თბილისელი, ხოლო 6 რეგიონული ჟურნალისტი იქნება. მონიტორინგის საბჭო ანგარიშს ყოველთვიურად გამოაქვეყნებს.
ქარტიის შექმნის ინიციატორისა და ორგანიზატორის, მედია ექსპერტის ია ანთაძის ცნობით, ხელმოწერის ღონისძიებას ევროპის საბჭოს წარმომადგენლები და სხცა უცხოელი სტუმრები დაესწრებიან.
