სასჯელაღსრულების, პრობაციისა და იურიდიული დახმარების საკითხთა სამინისტროს მუდმივმოქმედი კომისიის შუამდგომლობით, ორი პატიმარი სასჯელის დარჩენილ ვადას ეკლესია-მონასტრებში გაატარებს.
ამ მიზნით, სასჯელაღსრულების, პრობაციისა და იურიდიული დახმარების საკითხთა მინისტრი დიმიტრი შაშკინი და მინისტრის მოადგილეები კოკა სეფერთელაძე და ლევან ზარანდია პატიმრებთან ერთად საქართველოს საპატრიარქოს ესტუმრნენ და მეუფე თეოდორეს შეხვდნენ.
პატიმრებისთვის სასჯელის მოუხდელი ნაწილის საზოგადოებისათვის სასარგებლო შრომით შეცვლის თაობაზე სასამართლოს შესაბამისი წარდგინებით მუდმივმოქმედმა კომისიამ საქართველოს მთავრობასა და საქართველოს სამოციქულო ავტოკეფალურ მართლმადიდებელ ეკლესიას შორის გაფორმებული ურთიერთანამშრომლობის მემორანდუმის საფუძველზე მიმართა.
მემორანდუმის თანახმად, ეკლესია ვალდებულებას იღებს, მსჯავრდებული საზოგადოებისთვის სასარგებლო შრომით ეკლესიის დაქვემდებარებაში არსებულ მონასტრებსა და საეკლესიო-სამონასტრო მეურნეობებში, აგრეთვე ეკლესიის დაქვემდებარებაში მყოფ სხვა დაწესებულებაში დაასაქმოს.
ორმხრივი შეთანხმების პირობებს კი უშუალოდ სასჯელაღსრულების, პრობაციისა და იურიდიული დახმარების საკითხთა სამინისტრო ახორციელებს. საქართველოს სამოციქულო ეკლესია მზადყოფნას გამოთქვამს, ხელი შეუწყოს პატიმრების რესოციალიზაციას, საეკლესიო ცხოვრებაში მათ ჩართვასა და საზოგადოებისთვის სასარგებლო შრომაში მათ აქტიურ მონაწილეობას.