საპარლამენტო უმრავლესობა ენერგოვაუჩერების კამერების თანხლებით დარიგებას სოციალურ სოლიდარობას უწოდებს.
"ქრისტიან-დემოკრატების" მხრიდან საუბარი იმაზე, რომ უმრავლესობა კამერებით დადის და ისე არიგებს ენერგოვაუჩერებს, გათვლილი არ არის პიარზე და ეს სხვებისთვის მაგალითის მიმცემია, რასაც მოჰყვა ის, რომ 5000-მდე სახელმწიფო მოხელემ თავის ენერგოვაუჩერი გაჭირვებულ ადამიანებს გადასცა", - განაცხადა პარლამენტის პლენარულ სხდომაზე საკანონმდებლო ორგანოს თავმჯდომარის პირველმა მოადგილე მიხეილ მაჭავარიანმა.
მისივე განმარტებით, "ქრისტიან-დემოკრატების" ლოგიკით ქველომოქმედებას, რომელსაც საზოგადოებისთვის ცნობილი სახეები ეწევიან, აზრი დაეკარგებოდა.
"კამერებით სიარულით შეიძლება სულ არ იყო ბედნიერი, მაგრამ ეს იწვევს სხვებში სოლიდარობის განცდას, იგივე ხდება ბევრი ტელევიზიის საშუალებით, როდესაც შენზე გაჭირვებულ ადამიანს ეხმარები. ეს არის სოციალური სოლიდარობა და არა პიარი", - აღნიშნა მაჭავარიანმა.
დეპუტატის შეფასებით, არ შეიძლება პიარად განიხილო, როდესაც საუბარია იმაზე, თუ რას აკეთებს სახელმწიფო მოსახლეობის ყოფის შესამსუბუქებლად.
შეგახსენებთ, რომ დღევანდელ სხდომაზე "ქრისტიან-დემოკრატებმა" მთავრობის წევრები იმის გამო გააკრიტიკეს, რომ ისინი ენერგოვაუჩერების დასარიგებლად მოსახლეობასთან ტელეკამერებით დადიან.
"ადამიანს, როცა 20 ლარიან დახმარებაზე თვალზე ცრემლი ადგება, ეს იმას ნიშნავს, რომ მოსახლეობა სიღატაკეში ცხოვრობს. მინისტრებს უნდა რცხვენოდეთ, როცა 20 ლარიან ენერგოვაუჩერს სოციალურად შეჭირვებულ და თვალზე ცრემლმომდგარ ადამიანს ტელეკამერების წინაშე აძლევენ, მის ადგილზე მისატანად კი მანქანაში 100 ლარის ბენზინს ასხავენ", - განაცხადა ვეფხვაძემ დღევანდელ პლენარულ სხდომაზე.
