"რესპუბლიკური პარტიის" ერთ-ერთი ლიდერის დავით ბერძენიშვილის შეფასებით, მსოფლიო ახალი წესრიგის ჩამოყალიბების სტადიაში იმყოფება, რაც ავტორიტარული და პროდასავლული ხელისუფლებების მიმართ კეთილგანწყობას ამთავრებს.
"იცვლება საერთაშორისო კონიუნქტურა. გუშინწინ სააკაშვილი ლუკაშენკოს მეგობარი იყო, მაგრამ გუშინ ლუკაშენკომ ამერიკელებს უთხრა "ეგ თქვენი ძაღლიშვილიაო". გუშინწინ (ბუშის ადმინისტრაციის დროს) საქართველოში გაყალბებულ არჩევნებს აშშ-მ ბეჭედი დაარტყა, დღეს კი სხვა ვითარებაა. ბუნებრივია, მსოფლიოში მიმდინარე პროცესები ამერიკასა და ვეროპას ახალი მსოფლიო წესრიგისკენ უბიძგებს და ამაზე ლაპარაკობს ობამა, საერთაშორისო ორგანიზაციები და დიდი სახელმწიფოების საგარეო საქმეთა მინისტრები. ანუ, ჩვენ ამჟამად ვიმყოფებით მსოფლიოს ახალი წესრიგის ჩამოყალიბების სტატიაში. ეს ახალი წესრიგი ავტორიტარული და პროდასავლული ხელისუფლებების მიმართ კეთილგანწყობას ამთავრებს", - განუცხადა "ჯი-ეიჩ-ენს" ბერძენიშვილმა.
მისივე განმარტებით, "ახალი წესრიგის" გამო იმ ქვეყნებიდან, მათ შორის საქართველოდან, სადაც დეკლარირებული დემოკრატია არსებობს - სტაბილურობის ნაცვლად ანტიდემოკრატიული მიდგომები, დასავლული ინტერესი და ფული უფრო ინსტიტუციური მშენებლობისკენ გადავა.
"აღნიშნული საგარეო და ამას დამატებული საშინაო ფაქტორები მაფიქრებინებს, რომ საარჩევნო გარემოს გაუმჯობესების თაობაზე "ნაციონალური მოძრაობა" ოპოზიციასთან დათმობაზე წავა და ხელისუფლებაში საღი აზრი გაიმარჯვებს. ასეთ შემთხვევაში ე.წ. პოლიტიკური რვიანისა და მმართველი გუნდის დიალოგის ფორმატი იქნება წარმატებული", - განმარტა დავით ბერძენიშვილმა.
ამასთან, "რესპუბლიკელების" ერთ-ერთი ლიდერის შეფასებით, სწორედ დღეს დაადასტურებს ხელისუფლება დიალოგისთვისაა მზად საშინაო და საგარეო ფაქტორების გააზრებით, თუ კვლავ ყრუ კედლად აღიმართება საზოგადოებასა და "ნაციონალურ მოძრაობას" შორის.
შეგახსენებთ, რომ ხელისუფლება საარჩევნო გარემოს გაუმჯობესების თაობაზე ოპოზიციის წინადადებებზე საკუთარი პოზიციების დაფიქსირებას დღეიდან, 9 მარტიდან, დაიწყებს. სამუშაო ჯგუფის სპეციალური შეხვედრა ცესკოში გაიმართება.
