"თუ საარჩევნო გზით ქვეყნის პოლიტიკური განვითარების ფანჯარა დაიხურება, ავტომატურად გაიხსნება მეორე ფანჯარა", - განუცხადა "ჯი-ეიჩ-ენს" საპარლამენტო უმცირესობის ლიდერმა გიორგი თარგამაძემ.
მისივე თქმით, "მეორე ფანჯარას ხალხი გააღებს", თუმცა კონკრეტულად რა ფორმა ექნება მას, თარგამაძე ამ ეტაპზე არ აკონკრეტებს.
"ჩვენთვის პრინციპულად მნიშვნელოვანია ქვეყანაში სამართლიანი არჩევნების ჩატარება და კოსმეტიკური ცვლილებებით ეს პრობლემები ვერ მოგვარდება. პრობლემა უნდა მოხსნას არა იმან, ჩვენ ერთმანეთს რაში დავარწმუნებთ, არამედ იმან, საზოგადოება დაიჯერებს თუ არა რომ ქვეყანაში სამართლიანები არჩევნები ჩატარდება. თუ ეს ასე არ მოხდება, ამ შემთხვევაში, ნურავინ შეგვეკითხება, რას ვიზამთ, რადგან გადაწყვეტილებას მიიღებს ხალხი", - განმარტა თარგამაძემ.
ამასთან, საპარლამენტო უმცირესობის ლიდერის თქმით, ყველაზე მნიშვნელოვანი ის არის, რომ "ქართულმა სახელმწიფომ სააკაშვილის ხელისუფლების წასვლაში არ გადაიხადოს იმაზე მეტი ფასი, ვიდრე თავად ქართული სახელმწიფოებრიობის იდეა ღირს".
"ამის გამო ვიჩენთ ძალიან დიდ მოთმინებას, ვცდილობთ ვიყოთ მაქსიმალურად კონსტუქციულები და ამავე დროს პრინციპულები - არ დავთმოთ მნიშვნელოვანი საკითხები", - დასძინა გიორგი თარგამაძემ "ჯი-ეიჩ-ენთან" საუბრისას.
შეგახსენებთ, რომ საარჩევნო გარემოს გაუმჯობესების თაობაზე ოპოზიციის მიერ შეთავაზებულ წინადადებებზე პასუხების გაცემას ხელისუფლება ხვალიდან, 9 მარტიდან დაიწყებს.
