სამარშრუტო ტაქსების მძღოლთა საპროტესტო გამოსვლები მასობრივ მღელვარებაში არ გადაიზრდება. ამის შესახებ პოლიტოლოგმა სოსო ცინცაძემ "ჯი-ეიჩ-ენს" განუცხადა.
მისი თქმით, გამოსვლები ჯერ არაორგანიზებული და ქაოსურია.
"საპროტესტო მღელვარება დათო აქუბარდიას საეთერო რეჟიმში გამოსული საპროტესტო განწყობით არ წყდება. ეს საკანონმდებლო ორგანო არაა. მძღოლებმა უნდა შექმნან ძლიერი პროფკავშირები, სამოქალაქო საზოგადოება და საკუთარი უფლებების დაცვა ისწავლონ," _ განაცხადა "ჯი-ეიჩ-ენტან" საუბარში ცინცაძემ.
მისი აზრით, მძღოლებთან ერთად, სხვა სოციალური ფენის წარმომადგებლებმაც საკუთარი უფლებები უნდა დაიცვან. ეს შეეხება ექიმებს, მასწავლებლებს. წინააღმდეგ შემთხვევაში, ქაოტური სიტუაცია შეიქმნება.
პოლიტოლოგი მიიჩნევს, რომ მძღოლების მიერ საპროტესტო განწყობის გამოხატვამ გარკვეული შედეგი მაინც გამოიღო და ტენდერში გამარჯვებული კომპანიები უკვე დათმობაზე მიდიან.
"კომპანიები კომპრომისისთვის მზად არიან. ასეთი გამოსვლები დემოკრატიის გამოხატულებაა, რაც 10-15 წლის წინ წარმოუდგენელი იყო", _ მიიჩნევს სოსო ცინცაძე.
