რუსეთის საგარეო საქმეთა მინისტრის მოადგილემ, მიხაილ გალუზინმა დაადასტურა, რომ საქართველოს პრემიერ-მინისტრის სპეციალურ წარმომადგენელთან, გიორგი ზურაბაშვილთან შეხვედრას გამართავს. ამის შესახებ მან რუსულ მედიას განუცხადა.
კითხვაზე, ადასტურებდა თუ არა ინფორმაციას, რომ კონსულტაციები უახლოეს პერიოდში გაიმართებოდა, გალუზინმა უპასუხა: „იმედი მაქვს, რომ დიახ“.
ამასთან, მან შეხვედრის დღის წესრიგზე საუბრისგან თავი შეიკავა და აღნიშნა, რომ ამის შესახებ შეხვედრის გამართვამდე კომენტარს არ გააკეთებდა.
შეგახსენებთ, 16 ნოემბერს, საქრთველოს პრემიერ-მინისტრმა ირაკლი კობახიძემ განაცხადა, რომ ზურაბაშვილისა და გალუზინის პირველი შეხვედრა, სავარაუდოდ, უახლოეს პერიოდში გაიმართებოდა. მისი თქმით, შეხვედრა შესაძლოა არა თბილისში ან მოსკოვში, არამედ სხვა ადგილას ჩატარდეს.