ასოციაცია "სამართალი და თავისუფლება" გამოდის ინიციატივით, რომ სამხედრო ვალდებულების მოხდას დაქვემდებარებული მოქალაქის ასაკი 20-იდან 27 წლამდე უნდა განისაზღვროს, ნაცვლად 18-იდან 27-მდე.
"ასოციაცია სამართალი და თავისუფლება გამოდის ინიციატივით, რომ წვევამდელთა ასაკი, რომლებიც ექვემდებარებიან სამხედრო სავალდებულო სამსახურში გაწვევას, განისაზღვროს 20 წლიდან. აქამდე იყო 18-დან 27 წლამდე. ჩვენი ინიციატივა, რომ წვევამდელთა ასაკი განისაზვროს 20 წლიდან, ემყარება შემდეგ მიზეზებს და საფუძვლებს: როგორც სამხედრო მეთაურები და სამედიცინო ექსპერტები აცხადებენ, ქართველი ჭაბუკები 18 წლის ასაკში არ არიან ფიზიოლოგიურად და ფსიგოლოგიურად მზად, რომ მათ იმსახურონ სამხედრო სამსახურში და ადეკვატური სამსახური გაწიონ კრიზისულ ვითარებაში. სამხედრო სავალდებულო სამსახური თავისთავად კრიზისული მოვლენაა წვევამდელებისთვის. ამიტომ, სამხედრო სამსახურის მეთაურებისთვის უმჯობესია, რომ სამხედრო სამსახურში გაწვევის ასაკი უფრო მაღალი იყოს ვიდრე დღეს არის", - განაცხადა სესიაშვილმა დღეს გამართულ ბრიფინგზე.
მისი განმარტებით, 18 წლის ასაკი ჯერ კიდევ განვითარების ასაკია და წვევამდელი ვერ იქნება სრულფასოვნად მზად სამხედრო სამსახურისთვის. სესიაშვილის თქმით, ამით არც წვევამდელების რაოდენობა შემცირდება მნიშვნელოვნად.
"განათლების სისტემის რეფორმის შემდეგ (12 წლიანი ზოგადი განათლების შემოღება) წვევამდელები ხშირად მოდიოდნენ ჩვენთან და ამბობდნენ რომ ისინი სამხედრო სამსახურში გამოიძახეს და სწავლის გაგრძელებას ვერ ასწრებდნენ. აღნიშნული ცვლილება შესაძლებლობას მისცემს სამხედრო სამსახურში გასაწვევ მოქალაქეებს განათლების უფლების უზრუნველყოფისთვის", - განაცხადა სესიაშვილმა.
როგორც მან აღნიშნა, კანონპროექტის მიღების მიზანია სამხედრო სავალდებულო სამსახურში გასაწვევ მოქალაქეთა ზოგადი და უმაღლესი განათლების მიღების უფლების უზრუნველყოფა.
ასოციაცია "სამართალი და თავისუფლებამ" აღნიშნულ საკითხთან დაკავშირებით მოამზადა კანონპროექტი, რომელსაც საპარლამენტო უმცირესობასა და კომიტეტებს გადაუგზავნის.
