"გარემოს დაცვის სამინისტოს რეორგანიზაციის პროექტი შემუშავებულია ექსპერტის - საქართველოს მთავრობის მიერ", - აღნიშნულის შესახებ გარემოს დაცვისა და ბუნებრივი რესურსების კომიტეტის სხდომაზე ენერგეტიკის მინისტრის მოადგილე ნინო ენუქიძემ მას შემდეგ განაცხადა, რაც არასამთავრობო ორგანიზაციის "მწვანეთა მოძრაობის" თავმჯდომარე ნინო ჩხობაძემ მოითხოვა დაესახელებინათ ის სამთავრობო ექსპეტები, რომლებმაც აღნიშნული კანონპროექტი მოიწონეს.
"მე ვერ დაგისახელებთ სახელებით და გვარებით ამ ექსპერტებს, რადგან ეს კანონპროექტი საქართველოს მთავრობის მიერაა მიღებული, სწორედ საქართველოს მთავრობაა ექსპერტი", - აღნიშნა ენუქიძემ.
კომიტეტის დღევანდელ სხდომაზე გარემოს დაცვის სფროში მომუშავე არასამთავრობო ორგანიზაციებმა მოითხოვეს კანონპროექტში მოხდეს ასახვა იმ გარემოებისა, რომ გარემოზე ზემოქმედებას გარემოს დაცვის სამინისტრო განახორციელებს და მას შესაბამისი ფუნქციები ექნება. ასევე სოფლის მეურნეობის სამინისტროსთვის ნიადაგების გადაცემა არ მოხდეს, რადგან ერთმანეთისგან უნდა იყოს გამიჯნული სასოფლო სამეურნეო მიწები და ჩვეულებრივი ნიადაგი, რომელიც შეიძლება ტყის ფონდის საკუთრება იყოს.
ამასთან, გარემოს დაცვის საკითხზე მომუშავე ექსპერტების შეფასებით, დაცული ტერიტორიების ფუნქცია სუფთა გარემოს დაცვაა, ამიტომ უნდა დარჩეს გარემოს დაცვის სამინისტროს შემადგენლობაში, რადგან ეკონომიკისა და მდგრადი განვითარების სამინისტროსთვის მისი გადაცემის შემთხვევაში ადგილი ექნება ინტერესთა კონფლიქტს.
გარემოს დაცვისა და ბუნებრივი რესურსების კომიტეტის დღევანდელ სხდომაზე კომიტეტის თავმჯდომარემ აკაკი ბობოხიძემ მოითხოვა კომიტეტის წევრებისგან გამოსვლების დროს საკითხების წარმოდგენისას ენერგეტიკის სამინისტრო მისი ახალი და სრული დასახელებით მოიხსენიონ, რადგან "ხალხს რჩება შთაბეჭდილება, რომ გარემოს დაცვის სამინისტროდან ყველაფერი ენერგეტიკის სამინისტროს გადაეცა, რაც არასწორია".
