აშშ-ის სახელმწიფო მდივნის, მარკო რუბიოს განცხადებით, ამ ეტაპზე რუსეთ-უკრაინის ომის დიპლომატიური მოლაპარაკებებით დასრულების პერსპექტივა არ ჩანს.
ამის შესახებ რუბიომ ბერძნულ გამოცემა Kathimerini-სთან ინტერვიუში განაცხადა.
რუბიოს შეფასებით, რუსეთ-უკრაინის ომი „სტრატეგიულ ჩიხში“ აღმოჩნდა, საიდანაც გამოსვლა ან მოლაპარაკებების გზით, ან ესკალაციის შედეგად არის შესაძლებელი.
აშშ-ის სახელმწიფო მდივნის თქმით, დიპლომატიური ძალისხმევა ამ ეტაპზე შედეგს ვერ აღწევს, რადგან რუსეთი დონბასზე სრული კონტროლის მოთხოვნას აყენებს, რასაც უკრაინა მიუღებლად მიიჩნევს.
„ამჟამად მოლაპარაკებების გზით მოგვარების პერსპექტივა არ ჩანს. ჩვენ მზად ვართ, ნებისმიერი შესაძლო როლი შევასრულოთ ამის მისაღწევად. ამის გაკეთება უკვე ვცადეთ, თუმცა ეს მიზანი ჯერჯერობით მიუღწეველი რჩება, რადგან რუსები დონბასზე სრული კონტროლის მოთხოვნას აყენებენ, რასაც უკრაინა მიუღებლად მიიჩნევს“, - განაცხადა რუბიომ.
მისივე თქმით, აშშ კვლავ მზად არის, კონსტრუქციული როლი შეასრულოს დიპლომატიური გზით შეთანხმების მიღწევაში. ამასთან, რუბიომ შეშფოთება გამოთქვა ომის შესაძლო ესკალაციის გამო.
რუბიოს თქმით, შავი ზღვის აკვატორიაში გემებზე ახალი თავდასხმები განხორციელდა, რაც, მისი შეფასებით, დრონების კოორდინირებულ გამოყენებას უკავშირდება.
„სულ რაღაც გუშინ შავ ზღვაში გემებზე ახალი თავდასხმები მოხდა - დრონების გამოყენებით კოორდინირებული შეტევის სახით. ჩვენ შეშფოთებული ვართ მეზობელ ქვეყანაში დივერსიული ოპერაციის განხორციელების შესაძლებლობით, რომელიც შესაძლოა კონტროლიდან გამოვიდეს“, - განაცხადა აშშ-ის სახელმწიფო მდივანმა.
რუბიოს განცხადებით, ასევე არსებობს მკაფიო ნიშნები იმისა, რომ რუსეთი ზამთრის მოახლოების გამოყენებას უკრაინის ელექტროენერგეტიკული ქსელის გასანადგურებლად და ქვეყნის კაპიტულაციის იძულებისთვის გეგმავს.
მისივე თქმით, ამავდროულად, უკრაინამ გააძლიერა რუსეთის ტერიტორიაზე, მათ შორის ქვეყნის სიღრმეში, შორ მანძილზე დარტყმების შესაძლებლობები.
„შესაბამისად, ჩვენ ვიზიარებთ მთელ მსოფლიოში არსებულ შეშფოთებას კონფლიქტის ესკალაციის შესაძლებლობის გამო, რამაც შესაძლოა სხვა ქვეყნებიც მოიცვას და, შესაძლოა, უფრო ფართო კონფლიქტში გადაიზარდოს“, - აღნიშნა რუბიომ.
მისივე თქმით, აშშ კვლავ მზად არის, ხელი შეუწყოს სამშვიდობო პროცესს.
„თუ რაიმე შესაძლებლობა გაჩნდება, ანუ თუ მოლაპარაკებების გზით შეთანხმების მიღწევის შანსი იქნება, ჩვენ ნამდვილად გვჯერა, რომ ეს როგორც რუსეთისთვის, ისე უკრაინისთვის სასარგებლო იქნება“, - განაცხადა რუბიომ.
