პოლონეთის ქალაქ ოსტროლენკაში, პროფესიულ სკოლაში დანით თავდასხმის შედეგად სულ მცირე რვა ადამიანი დაშავდა. თავდამსხმელი პოლიციამ დააკავა. ინფორმაციას პოლონური მედია ადგილობრივ პოლიციაზე დაყრდნობით ავრცელებს.
თავდასხმა პროფესიულ სკოლაში ოთხშაბათს დილით მოხდა. პოლიციის ინფორმაციით, დაკავებული 19 წლის კაცია, რომელიც ამავე სკოლის მოსწავლეა. მან თავდასხმის შემდეგ სკოლის ტერიტორია დატოვა, თუმცა სამართალდამცველებმა მისი დაკავება მალევე შეძლეს.
დაშავებულთა უმეტესობა მოსწავლეა, მათ შორის ერთი მასწავლებელიცაა. ორი დაშავებულის მდგომარეობა მძიმეა.
ქალაქ ოსტროლენკის მერმა პაველ ნევიადომსკიმ განაცხადა, რომ ვითარება კონტროლს ექვემდებარება. თავდასხმის მოტივი ამ დროისთვის უცნობია და შემთხვევას სამართალდამცველები იძიებენ.
