ლიეტუვამ შესაძლოა რუსი მოქალაქეების ქვეყნის გავლით ტრანზიტი შეზღუდოს, თუ რუსეთში პნევმონიური ჭირის შემთხვევა დადასტურდება და დაავადება ლიეტუვისთვის საფრთხეს შექმნის. ამის შესახებ ლიეტუვის ჯანდაცვის მინისტრმა ლინას კუკურაიტისმა განაცხადა.
მისი თქმით, გადაწყვეტილება ვითარების მასშტაბსა და მიღებული ინფორმაციის სანდოობაზე იქნება დამოკიდებული და შესაბამისი ზომები ევროკავშირის პარტნიორებთან კოორდინაციით მიიღება.
„შეიძლება, ეს, რა თქმა უნდა, მასშტაბსა და ინფორმაციის სიზუსტესა და სანდოობაზეა დამოკიდებული. თუმცა, ეს გადაწყვეტილებები ჩვენს ევროპელ პარტნიორებთან ერთად მიიღება. კოვიდის პერიოდიდან მოყოლებული, ტრანსპორტის შეზღუდვისთვის საერთო ალგორითმები გვაქვს შემუშავებული“,- განაცხადა კუკურაიტისმა.
მინისტრის თქმით, ლიეტუვა და ევროპის სხვა ქვეყნები, ისევე როგორც აშშ, რუსეთში განვითარებულ მოვლენებს ინტენსიურად აკვირდებიან. მისი განცხადებით, ამ ეტაპზე რუსეთში ფილტვის ჭირის შემთხვევა ოფიციალურად დადასტურებული არ არის.
ევროპის დაავადებათა პრევენციისა და კონტროლის ცენტრის (ECDC) ინფორმაციითაც, ამ დროისთვის არ არსებობს მეორეული შემთხვევების ან დაავადების ადამიანიდან ადამიანზე მდგრადი გადაცემის მტკიცებულება. ორგანიზაცია ვითარებას აკვირდება.
ჯანდაცვის მსოფლიო ორგანიზაციის ინფორმაციით, რუსეთის ირკუტსკის ოლქში ლაბორატორიის თანამშრომლის გარდაცვალების მიზეზი ოფიციალურად ჯერ არ დადასტურებულა. ორგანიზაციის წინასწარი შეფასებით, ფართო მოსახლეობისთვის საზოგადოებრივი ჯანდაცვის რისკი დაბალია.
