უკრაინის ჩერნიჰივის ოლქის ქალაქ პრილუკში რუსეთის სარაკეტო იერიშის შედეგად დაღუპულთა რაოდენობა 9-მდე გაიზარდა, დაშავებულია 40 ადამიანი. ნანგრევების გაწმენდისა და ადამიანების ძებნის სამუშაოები გრძელდება. ინფორმაციას უკრაინული მედია ავრცელებს.
უკრაინის საგანგებო სიტუაციების სახელმწიფო სამსახურის ინფორმაციით, დაღუპულთა შორის სამი ბავშვია. მათი ცხედრები მრავალსართულიანი საცხოვრებელი სახლის ნანგრევებიდან ამოიყვანეს.
დაშავებულთა შორის შვიდი ბავშვია. მაშველებმა ნანგრევებიდან 12 ადამიანის, მათ შორის ერთი ბავშვის, გადარჩენა შეძლეს. საგანგებო სიტუაციების სამსახურის ფსიქოლოგებმა დახმარება 36 ადამიანს გაუწიეს.
ამ დროისთვის მაშველები და სხვა შესაბამისი სამსახურები ნანგრევებში ადამიანების ძებნას განაგრძობენ.
7 ოქტომბრის დილით რუსმა ოკუპანტებმა ჩერნიჰივის ოლქის ქალაქ პრილუკზე სარაკეტო იერიში მიიტანეს. დარტყმა მრავალსართულიან შენობაზე დაფიქსირდა.
